FIFA fransiyalik futbolchi bilan bog‘liq muammo sabab “Nasaf”ga qo‘yilgan taqiqni olib tashladi

FIFA “Nasaf”ga qo‘yilgan transfer taqiqini olib tashladi. Bu haqida PFL matbuot xizmati ma’lum qildi.

FIFA Nizolarni hal etish palatasi “Nasaf” klubi va uning fransiyalik futbolchisi Diakite Abdelaye o‘rtasidagi nizoli vaziyat yuzasidan qaror chiqarib, klubga futbolchi oldidagi belgilangan qarzdorlikni to‘lash vazifasini yuklagan edi. Ammo mazkur qaror ijrosi ta’minlanmagani bois FIFA 2021-yil dekabr oyida “Nasaf” uchun transfer taqiqini kuchga kiritgandi.

24-fevral kuni “Nasaf” jamoasi Diakite oldidagi qarzdorlikni to‘liq bartaraf etdi va ishni yopish yuzasidan FIFAga murojaat yubordi. FIFA 25-fevraldan e’tiboran mazkur ishni yopdi va “Nasaf”dan transfer taqiqini olib tashladi.

Avvalroq “Buxoro” futbol klubi va uning sobiq darvozaboni turkmanistonlik Rahat Japarov o‘rtasidagi nizoli vaziyat yuzasidan FIFA buxoroliklarga transfer taqiqini qo‘ygandi. 10-fevral kuni “Buxoro” jamoasi Japarov oldidagi qarzdorlikni to‘liq bartaraf etgan va undan transfer taqiqi olib tashlangandi.