Jinoyat ishlari bo‘yicha Mirzo Ulug‘bek tumani sudida 23-fevral kuni 1999-yil 16-fevral kungi portlashlarga aloqador shaxsga nisbatan sud ishini ko‘rib chiqish bo‘yicha sud jarayoni nihoyasiga yetib, sud hukmi o‘qildi. Bu haqda Toshkent shahar sudlari xabar qildi.
Qayd etilishicha, jinoyat ishi jinoyat ishlari bo‘yicha Mirzo Ulug‘bek tuman sudi sudyasi B. Berdiyev raisligida ko‘rib chiqilgan. Sudlanuvchi J.Y. (1969-yilda Toshkent shahrida tug‘ilgan) Jinoyat kodeksining 155-moddasi (terrorizm), 159-moddasi (O‘zbekiston Respublikasining konstitutsiyaviy tuzumiga tajovuz qilish), 161-moddasi (qo‘poruvchilik), 164-moddasi (bosqinchilik), 223-moddasi (qonunga xilof ravishda chet elga chiqish yoki O‘zbekiston Respublikasiga kirish), 242-moddasi (jinoiy uyushma tashkil etish) hamda 244-2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) da nazarda tutilgan jinoyatlarni sodir etganlikda aybdor deb topilgan.
53 yoshli ushbu shaxsga nisbatan uzil-kesil o‘tash uchun 20 yil muddatga ozodlikdan mahrum qilish jazosi tayinlangan.
“Hukmdan norozi taraflar hukm e’lon qilingan kundan boshlab, yigirma sutka ichida shikoyat berishi yoki protest bildirishga haqli”, — deyiladi xabarda.
Jinoyatchi haqida
1969-yil Toshkent viloyatida tug‘ilgan ushbu shaxs 1998-yilning boshlarida Chechenistonga borib, iordaniyalik Amir Xattob tomonidan tashkil qilingan jangarilar lagerida maxsus tayyorgarlikdan o‘tgan va o‘sha yilning oxirlarida Afg‘onistondagi “TIH” xalqaro terroristik tashkiloti safiga qo‘shilgan.1999-yilning yanvar oyida tashkilot yetakchilarining ko‘rsatmasi bilan u aylanma yo‘llar orqali Toshkent shahriga kelib, badavlat odamlarning uylarida bosqinchiliklarni amalga oshirgan hamda ularning pul va qimmatbaho buyumlarini o‘zlashtirib, Afg‘onistondagi “TIH” yetakchilariga yuborgan.
Mazkur shaxs 1999-yilning 16-fevral va 30-mart kunlari Toshkent shahrida amalga oshirilgan qo‘poruvchilik harakatlarida ham ishtirok etgani aytilmoqda. Shuningdek, u 1998—2006-yillarda xorijiy davlatlardagi xalqaro terroristik tashkilotlar safida jangovar harakatlarda qatnashgan.
Ushbu shaxs DXX tomonidan ushlanib, 2021-yilning sentabr oyida mamlakatga olib kelingan.
Mavzuga doir:
- Surxondaryoda maktab o‘quvchilari orasida jihod va hijrat g‘oyalarini targ‘ib qilgan shaxslarga sud hukmi o‘qildi
- Samarqandda “Jihodchilar”ning 11 nafar virtual a’zosiga hukm o‘qildi
- Toshkentda Suriyaga borib, jangarilar safiga qo‘shilishni rejalashtirgan talaba va ikki nafar maktab o‘quvchisi ushlandi
Izoh (0)