Umra mavsumida Madina aeroportida ikki nafar o‘zbekistonlik ziyoratchi Saudiya Arabistoni Chegara xavfsizlik xizmati tomonidan to‘xtatib qolindi. Ularda mamlakatga kirishga taqiq borligi aniqlangan. Bu haqda O‘zbekiston musulmonlari idorasi xabar qildi.
Ma’lum bo‘lishicha, ikki nafar fuqaro Qirg‘izistonning qalbaki pasporti bilan 2019-yil Umra safariga borib kelgan. Saudiya Arabistonidan chiqish vaqtida mamlakat qonunlarini buzgani uchun chegara xavfsizlik xizmati tomonidan ularga nisbatan mamlakatga kirish uchun 10 yil muddatga taqiq belgilangan. Shu bois ular podshohlikka kiritilmagan. Hozirda ularni O‘zbekistonga qaytarish choralari ko‘rilmoqda.
“Shu o‘rinda mo‘min-musulmonlardan Umra safarini turli qing‘ir yo‘llar orqali, noqonuniy amalga oshirmaslik hamda har xil ko‘ngilsizliklarga duchor bo‘lmaslikka chaqiramiz. Ushbu ziyoratchilarga ajratilgan ikki o‘rinni behuda ketishiga sababchi bo‘ldi”, — deyiladi xabarda.
2022-yil 10-fevralidan O‘zbekistondan Saudiya Arabistoniga Umra safari uchun aviareyslar bir hafta davomida jami 16 marta amalga oshirilish boshlandi. Haftaning har seshanba va shanba kunlari 3 marta, qolgan besh kunida 2 tadan reys yo‘lga qo‘yilgan.
Avvalroq O‘zbekistonda Umra ziyorati qachondan boshlanishi va uning narxlari haqida ma’lumot berilgandi. Unda 2020-yil fevral oyiga qadar Umra ziyorati uchun oxirgi belgilangan to‘lovlarni amalga oshirganlar qo‘shimcha ravishda 4 770 000 so‘m mablag‘ to‘lashi ham keltirib o‘tilgan edi. Ijtimoiy tarmoqlarda ushbu qo‘shimcha to‘lov borasida turli mulohazalar bildirilganidan so‘ng, Musulmonlar idorasi holatga izoh berib, koronavirus pandemiyasi Umra xizmatlari ko‘rsatishga ham salbiy ta’sir ko‘rsatganini ma’lum qildi. Qayd etilishicha, mehmonxonada 4 kishilik xonaga 2 nafar ziyoratchi, 50 o‘rindiqli avtobusga 25 kishi joylashtirish kabi talablar o‘rnatilgan. 22-yanvar kuni erta tongda Umra—2022 mavsumining ilk ziyoratchilari Toshkent xalqaro aeroportidan Saudiya Arabistoniga jo‘nab ketgandi.
Eslatib o‘tamiz, Saudiya Arabistoni hukumati chet elliklar kichik haj — Umra ziyoratini amalga oshirish uchun 10-avgustdan qirollikka kirishi mumkinligini e’lon qilgan edi. Ziyoratchilar qirollikda tasdiqlangan Pfizer, Moderna, Johnson & Johnson, AstraZeneca vaksinalaridan biri bilan emlangan bo‘lishi yoki manfiy javobli PZR-testni taqdim etishi kerak. Vaksina olmagan ziyoratchilar mamlakatga kelganidan keyin uch kunlik karantindan o‘tib, so‘ng koronavirusga nisbatan qaytadan PZR-test topshiradi.
Izoh (0)