Тошкентда 16 февраль воқеаларида иштирок этган шахс 20 йилга қамалди

Жиноят ишлари бўйича Мирзо Улуғбек тумани судида 23 февраль куни 1999 йил 16 февраль кунги портлашларга алоқадор шахсга нисбатан суд ишини кўриб чиқиш бўйича суд жараёни ниҳоясига етиб, суд ҳукми ўқилди. Бу ҳақда Тошкент шаҳар судлари хабар қилди.

Қайд этилишича, жиноят иши жиноят ишлари бўйича Мирзо Улуғбек туман суди судьяси Б. Бердиев раислигида кўриб чиқилган. Судланувчи Ж.Й. (1969 йилда Тошкент шаҳрида туғилган) Жиноят кодексининг 155-моддаси (терроризм), 159-моддаси (Ўзбекистон Республикасининг конституциявий тузумига тажовуз қилиш), 161-моддаси (қўпорувчилик), 164-моддаси (босқинчилик), 223-моддаси (қонунга хилоф равишда чет элга чиқиш ёки Ўзбекистон Республикасига кириш), 242-моддаси (жиноий уюшма ташкил этиш) ҳамда 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) да назарда тутилган жиноятларни содир этганликда айбдор деб топилган.

53 ёшли ушбу шахсга нисбатан узил-кесил ўташ учун 20 йил муддатга озодликдан маҳрум қилиш жазоси тайинланган.

«Ҳукмдан норози тарафлар ҳукм эълон қилинган кундан бошлаб, йигирма сутка ичида шикоят бериши ёки протест билдиришга ҳақли», — дейилади хабарда.

Жиноятчи ҳақида

1999 йилнинг январь ойида ташкилот етакчиларининг кўрсатмаси билан у айланма йўллар орқали Тошкент шаҳрига келиб, бадавлат одамларнинг уйларида босқинчиликларни амалга оширган ҳамда уларнинг пул ва қимматбаҳо буюмларини ўзлаштириб, Афғонистондаги «ТИҲ» етакчиларига юборган.

Мазкур шахс 1999 йилнинг 16 февраль ва 30 март кунлари Тошкент шаҳрида амалга оширилган қўпорувчилик ҳаракатларида ҳам иштирок этгани айтилмоқда. Шунингдек, у 1998—2006 йилларда хорижий давлатлардаги халқаро террористик ташкилотлар сафида жанговар ҳаракатларда қатнашган.

Ушбу шахс ДХХ томонидан ушланиб, 2021 йилнинг сентябрь ойида мамлакатга олиб келинган.