Toshkentda 1999-yilda amalga oshirilgan qo‘poruvchilik harakatlarida ishtirok etgan shaxs 22 yil o‘tib qo‘lga olindi

DXX xodimlari tomonidan “Turkiston islom harakati” (“TIH”) xalqaro terroristik tashkiloti a’zosi, O‘zbekiston hududida o‘ta og‘ir jinoyatlar sodir etgani sababli 23 yildan buyon qidiruvda bo‘lgan Yu.J. xorijda ushlanib, mamlakatga olib kelindi. Bu haqda idora matbuot xizmatiga tayanib, O‘zA xabar berdi.

Ma’lum qilinishicha, 1969-yil Toshkent viloyatida tug‘ilgan ushbu shaxs 1998-yilning boshlarida Chechenistonga borib, iordaniyalik Amir Xattob tomonidan tashkil qilingan jangarilar lagerida maxsus tayyorgarlikdan o‘tgan va o‘sha yilning oxirlarida Afg‘onistondagi “TIH” xalqaro terroristik tashkiloti safiga qo‘shilgan.

1999-yilning yanvar oyida tashkilot yetakchilarining ko‘rsatmasi bilan u aylanma yo‘llar orqali Toshkent shahriga kelib, badavlat odamlarning uylarida bosqinchiliklarni amalga oshirgan hamda ularning pul va qimmatbaho buyumlarini o‘zlashtirib, Afg‘onistondagi “TIH” yetakchilariga yuborgan.

Mazkur shaxs 1999-yilning 16-fevral va 30-mart kunlari Toshkent shahrida amalga oshirilgan qo‘poruvchilik harakatlarida ham ishtirok etgani aytilmoqda. Shuningdek, u 1998—2006-yillarda xorijiy davlatlardagi xalqaro terroristik tashkilotlar safida jangovar harakatlarda qatnashgan.

Hozirda Yu.J.ga nisbatan qo‘zg‘atilgan jinoyat ishi doirasida tergov harakatlari olib borilmoqda.

Avvalroq Toshkentda va Toshkent viloyatida “Hizb ut-Tahrir”ga a’zo 29 nafar ayol aniqlangani, Toshkentda xalqaro terrorchilik tashkilotlarining yana bir guruh a’zolari ushlangani to‘g‘risida xabar berilgandi.