Serxio Ramosning “Real”dan ketishi sababi ma’lum qilindi

Serxio Ramos “Real”dan Xerard Pike “Barselona”da oladigan maoshni talab qilgan.

Diario Sport xabariga ko‘ra, 2021-yilning yozida erkin agent sifatida “PSJ” safiga o‘tgan 35 yoshli himoyachi madridliklar bilan yangi shartnoma borasida muzokara olib borayotganda “Barselona” futbolchisining olayotgan maoshidan argument sifatida foydalangan.

“Pike katta maosh oladi, men xuddi u kabi yoki undan ko‘proq maosh olishni istayman”, — deb murojaat qilgan Ramos klub prezidenti Florentino Peresga.

Avvalroq Xerard Kataloniya klubida soliqlar bilan birga yiliga 28 million yevro maosh olishi xabar qilingandi. Shundan so‘ng Pike Twitter sahifasida 2,3 million yevro ko‘rsatilgan bank chekini ko‘rsatdi va bu 2021-yilda olgan maoshining 50 foizi ekanligini ma’lum qildi.

Serxio bir necha yillar davomida Pike undan ko‘p maosh olishini bilganidan so‘ng hafsalasi pir bo‘lgan va hatto “Barselona” futbolchilaridan ushbu ma’lumot to‘g‘riligini tasdiqlashni so‘ragan. Unga bu rostligi tushuntirilgan.

Ramosning “PSJ”dagi maoshi yiliga 6 million yevroni tashkil etadi. U “Madrid”dan yiliga 12 million yevro maosh talab qilgan.