“Seni ‘Yuventus’ yollagan”. Joze Mourinyo “Verona”ga qarshi bahsda hakamga baqirgani uchun diskvalifikatsiya qilinishi mumkin

“Roma” bosh murabbiyi Joze Mourinyo Italiya chempionatining 2—3 o‘yiniga diskvalifikatsiya qilinishi mumkin.

Football Italia’ning xabar berishicha, A Seriyaning 26-turidan o‘rin olgan “Verona”ga qarshi bahsda (2:2) o‘zini tutishi portugaliyalik mutaxassisning chetlatilishiga sabab bo‘lishi mumkin.

Qo‘shib berilgan daqiqalarda uchrashuv bosh hakami Luka Payretto qo‘ng‘iroq ishorasini ko‘rsatgani uchun 59 yoshli murabbiyga qizil kartochka ko‘rsatdi. Undan tashqari Mourinyo hakamga qarata: “Ular seni atayin yuborgan, ‘Yuventus’ seni yollagan!”, — deb baqirgan. Bu esa uning zarariga ishlashi mumkin.

Qayd etish kerak, Mourinyo bungacha bir necha bor musobaqalardagi hakamlikdan noroziligini bildirgandi.

Rimliklarni oldinda “Spetsiya” (27-fevral), “Atalanta” (6-mart) va “Udineze”ga (13-mart) qarshi bahslar kutib turibdi. 2021/22-yilgi mavsumda “Roma” Italiya chempionatida 26 o‘yindan so‘ng 41 ochko bilan sakkizinchi o‘rindan joy olgan.

Mavzuga doir: Bolalikdan yetuklikkacha. 59 yoshni qarshi olgan Joze “Benazir” Mourinyoning hayoti suratlarda