Ўзбекистон билан Саудия Арабистони ўртасида дипломатик муносабатлар ўрнатилганига 30 йил тўлгани муносабат билан 20 февраль куни ташқи ишлар вазири Абдулазиз Комилов ҳамкасби Файсал бин Фархон ал-Саудга табрик йўллади. Бу ҳақда Ташқи ишлар вазирлиги расмий вакили хабар қилди.
Қайд этилишича, мактубда Ўзбекистон—Саудия Арабистони муносабатлари сўнгги йилларда ижобий суръат касб этиб, амалий мазмунга эга бўлаётгани қайд этилган. Ўзаро алоқа ва алмашинувларнинг давом эттирилиши натижасида ҳамкорлик сифат жиҳатидан янги босқичга кўтарилгани таъкидланган.
Ўзбекистон томони Саудия Арабистони билан барча соҳаларда ўзаро манфаатли конструктив ҳамкорликни давом эттиришга тайёрлиги билдирган.
Таъкидланишича, 2023 йилда Бутунжаҳон туризм ташкилоти Бош ассамблеясининг 25-сессиясини Самарқанд шаҳрида ўтказиш бўйича Ўзбекистон ташаббусини Саудия Арабистони томони қўллаб-қувватлаган.
Эслатиб ўтамиз, 19 февраль куни Абдулазиз Комилов ва АҚШ давлат котиби Энтони Блинкен ўзаро табрик алмашганди. Улар икки давлат ўртасида дипломатик муносабатлар ўрнатилганининг 30 йиллиги муносабати билан ўзаро қутлов мактубларини йўллаган.
Изоҳ (0)