“Davlat bojxona xizmati to‘g‘risida”gi qonunga qo‘shimcha va o‘zgartirishlar kiritildi. Bu boradagi tegishli qonun prezident tomonidan imzolangan, deb xabar beradi Telegram’dagi “Huquqiy axborot” kanali”.
Shunga ko‘ra, bojxona organlarining:
- jinoiy faoliyatdan olingan daromadlarni legallashtirishga, terrorizmni va ommaviy qirg‘in qurolini tarqatishni moliyalashtirishga qarshi kurashish bo‘yicha chora-tadbirlarni ishlab chiqish hamda amalga oshirishda ishtirok etishi;
- jismoniy va yuridik shaxslarga qonunchilikda belgilangan tartibda pulli xizmatlar ko‘rsatish huquqiga ega ekani;
- bojxona nazoratini amalga oshirishda maxsus vosita sifatida xizmat itlaridan foydalanishi mumkinligi belgilangan.
Shuningdek, qonunda bojxona organlariga qabul qilingan xodimlarning majburiy tartibda birlamchi kasbiy qayta tayyorgarlikdan o‘tishi kerakligi belgilangan.
Sodir etgan jinoyati uchun ilgari hukm qilinganlar, qo‘llanilgan jazo turidan, sudlanganlik holati tugatilganidan yoki olib tashlanganidan va o‘ziga nisbatan amnistiya akti yoki afv etish qo‘llanilganidan qat’i nazar, yoxud yarashuv munosabati bilan jinoiy javobgarlikdan ozod qilingan fuqarolar bojxona organlariga xizmatga qabul qilinmaydi.
Davlat bojxona qo‘mitasi raisining buyrug‘i bilan O‘zbekiston yoki chet davlatning OTM va tashkilotlariga magistratura mutaxassisliklari bo‘yicha o‘qishga yuborilgan bojxona organi xodimi o‘qish davrida, oxirgi egallagan lavozimidagidan kam bo‘lmagan miqdorlardagi pul ta’minoti saqlangan holda bojxona organlarining ixtiyorida qoldiriladi.
Avvalroq O‘zbekistonda bojxona xodimlari va ularning farzandlariga OTMga kirishda alohida kvota ajratilishi, bojxona tizimida xodimlar daromadi va mol-mulkini deklaratsiya qilish joriy etilishi, O‘zbekistondagi asosiy bojxona postlarini zamonaviy uskunalar bilan jihozlashga 370 milliard so‘m ajratilishi to‘g‘risida xabar berilgandi.
Izoh (0)