«Давлат божхона хизмати тўғрисида»ги қонунга қўшимча ва ўзгартиришлар киритилди. Бу борадаги тегишли қонун президент томонидан имзоланган, деб хабар беради Telegram’даги «Ҳуқуқий ахборот» канали».
Шунга кўра, божхона органларининг:
- жиноий фаолиятдан олинган даромадларни легаллаштиришга, терроризмни ва оммавий қирғин қуролини тарқатишни молиялаштиришга қарши курашиш бўйича чора-тадбирларни ишлаб чиқиш ҳамда амалга оширишда иштирок этиши;
- жисмоний ва юридик шахсларга қонунчиликда белгиланган тартибда пулли хизматлар кўрсатиш ҳуқуқига эга экани;
- божхона назоратини амалга оширишда махсус восита сифатида хизмат итларидан фойдаланиши мумкинлиги белгиланган.
Шунингдек, қонунда божхона органларига қабул қилинган ходимларнинг мажбурий тартибда бирламчи касбий қайта тайёргарликдан ўтиши кераклиги белгиланган.
Содир этган жинояти учун илгари ҳукм қилинганлар, қўлланилган жазо туридан, судланганлик ҳолати тугатилганидан ёки олиб ташланганидан ва ўзига нисбатан амнистия акти ёки афв этиш қўлланилганидан қатъи назар, ёхуд ярашув муносабати билан жиноий жавобгарликдан озод қилинган фуқаролар божхона органларига хизматга қабул қилинмайди.
Давлат божхона қўмитаси раисининг буйруғи билан Ўзбекистон ёки чет давлатнинг ОТМ ва ташкилотларига магистратура мутахассисликлари бўйича ўқишга юборилган божхона органи ходими ўқиш даврида, охирги эгаллаган лавозимидагидан кам бўлмаган миқдорлардаги пул таъминоти сақланган ҳолда божхона органларининг ихтиёрида қолдирилади.
Аввалроқ Ўзбекистонда божхона ходимлари ва уларнинг фарзандларига ОТМга киришда алоҳида квота ажратилиши, божхона тизимида ходимлар даромади ва мол-мулкини декларация қилиш жорий этилиши, Ўзбекистондаги асосий божхона постларини замонавий ускуналар билан жиҳозлашга 370 миллиард сўм ажратилиши тўғрисида хабар берилганди.
Изоҳ (0)