Ijtimoiy tarmoqlarda Navoiy shahridagi “Yangi hayot” savdo majmuasida bobo va nabira eskalatordan qulab tushgani tasvirlangan videolavha tarqaldi. Navoiy viloyati IIB holatga oid ma’lumotlar bilan bo‘lishdi.
Ma’lum qilinishicha, ko‘ngilsiz hodisa 18-fevral kuni soat 20:30 larda sodir bo‘lgan. Karmana tumanida yashovchi Sh.T. (1969-yilda tug‘ilgan) 3 yoshli nabirasi A.S. bilan Navoiy shahridagi “Yangi hayot” savdo majmuasiga borgan. Ular savdo majmuasining 5- va 4-qavat oralig‘idagi eskalatorda muvozanatni yo‘qotib, 1-qavatga tushib ketgan.
Fuqaro Sh.T. voqea joyida vafot etgan. Tan jarohati olgan A.S. esa viloyat ko‘p tarmoqli bolalar tibbiyot markaziga yotqizilgan.
Holat yuzasidan Navoiy shahar IIB huzuridagi Tergov bo‘limi tomonidan tergovga qadar tekshiruv harakatlari olib borilmoqda.
“Gazeta.uz”ning ma’lum qilishicha, hozirda bolaning ahvoli og‘ir va u reanimatsiya bo‘limida. Unga og‘ir qo‘shma jarohat, xususan, bosh miya yopiq jarohati, uning lat yeyishi, chanoq suyaklarining o‘ng tomonlama sinishi bilan tashxis qo‘yilgan. Shuningdek, unda peshona sohasi teriosti gematomasi hamda posttravmatik shokning og‘ir darajasi qayd etilgan. Shifokorning so‘zlariga ko‘ra, bolaning es-hushi karaxtlashgan, 19-fevral MRT va boshqa barcha tekshiruvlar o‘tkazilgan. Standartlar bo‘yicha barcha muolajalar olib borilyapti.
Avvalroq Andijon davlat universiteti binosi to‘rtinchi qavatidan ota-onalar majlisiga kelgan ayol tushib ketgani to‘g‘risida xabar berilgandi.
Izoh (0)