Samarqandda darslarga qatnashmasdan, 20 kunda “prava” olib berishni va’da qilgan xususiy maktab rahbari ushlandi

Samarqand viloyati Toyloq tumanida haydovchilik guvohnomasining toifasini o‘zgartirib berish uchun pul so‘ragan shaxs qo‘lga olindi, deb xabar beradi viloyati IIB axborot xizmati.

Ma’lum qilinishicha, 14-fevral kuni fuqaro A. Samarqand viloyati IIB YHXBga o‘zining “B, C” toifali haydovchilik guvohnomasini “BE, CE” toifali haydovchilik guvohnomasiga almashtirish maqsadida borganida, IIOga aloqasi bo‘lmagan Sh. ismli shaxs shu yerda ishlovchi tanishlari orqali 900 ming so‘m evaziga yangi “BE, CE” haydovchilik guvohnomasi olib berishini aytganini bildirib, ariza bilan murojaat qilgan.

Arizaga asosan, IIV Shaxsiy xavfsizlik bosh boshqarmasi Samarqand viloyati bo‘yicha boshqarmasi xodimlari tomonidan tezkor tadbir o‘tkazilib, Toyloq tumani “Davlatobod” qishlog‘ida yashovchi, X.Sh. ariza muallifidan 900 ming so‘m miqdoridagi pullarni olayotgan vaqtida daliliy ashyolar bilan ushlanib, rasmiylashtirilgan.

Hozirda X.Sh.ga nisbatan Toyloq tumani IIB huzuridagi Tergov bo‘limi tomonidan Jinoyat kodeksining 168-moddasi (firibgarlik) 1-qismi va 28, 211-moddasi (jinoyat ishtirokchilarining turlari, pora berish) 1-qismi bilan jinoyat ishi qo‘zg‘atilib, tergov harakatlari olib borilmoqda.

Shuningdek, Samarqand viloyati IIBga Payariq tumanida yashovchi fuqaro ariza bilan murojaat qilib, unda Ishtixon tumanida yashovchi R.A. ismli shaxs o‘zining xususiy avtomaktabi borligini, 20 kun muddatda “B va C” toifali haydovchilik guvohnomasini o‘qimasdan imtihondan o‘tkazib, olib berishni va’da qilganini bildirgan. Buning evaziga u 1000 dollar pul so‘ragan.

Arizaga asosan, 8-fevral kuni Samarqand viloyati IIB JQB Korrupsiya va iqtisodiy jinoyatlarga qarshi kurashish bo‘limi xodimlari tomonidan Oqdaryo tumanida o‘tkazilgan tezkor tadbir davomida R.A. ariza muallifidan 500 dollar miqdordagi pullarni olgan vaqtida ashyoviy dalillar bilan ushlangan.

Mazkur holat yuzasidan Oqdaryo tuman IIB huzuridagi Tergov bo‘limi tomonidan tergovga qadar tekshirish harakatlari olib borilmoqda.

Avvalroq Surxondaryoda darslarga qatnashmasdan, 15 kunda “prava” olib berishni va’da qilgan instruktor ushlangani, Buxoroda tanishlari orqali haydovchilik guvohnomasi olib berish uchun 3 mln so‘m pora olgan avtomaktab o‘qituvchisi qo‘lga olingani to‘g‘risida xabar berilgandi.

Ichki ishlar vaziri o‘rinbosari, jamoat xavfsizligi departamenti boshlig‘i Bekmurod Abdullayev faqat yetarli bilim va malakaga ega haydovchilarga guvohnoma berilishni boshlagach, yo‘llarda haydovchilik madaniyati oshadi, yo‘l-transport hodisalari kamayishini aytib o‘tdi.