Ijtimoiy tarmoqlarda Toshkent shahridagi Abdulla Qodiriy bog‘ida 64 ta daraxt ko‘chirilgani to‘g‘risida xabarlar tarqaldi. Toshkent shahar ekologiya va atrof-muhitni muhofaza qilish boshqarmasi mazkur holatga munosabat bildirdi.
Ma’lum qilinishicha, Olmazor tumanidagi Abdulla Qodiriy bog‘i 2022-yilning yanvar oyida davlat inspektorlari tomonidan o‘rganilgan. O‘rganish jarayonida ushbu bog‘ hududida qurilish ishlari olib borilishi uchun ajratilgan yer maydonidagi daraxtlar tadbirkor tomonidan kerakli hujjatlar rasmiylashtirmasdan, noqonuniy ravishda boshqa joyga ko‘chirilgani aniqlangan.
Holat yuzasidan inspektorlar joyida bayonnoma rasmiylashtirib tadbirkorga Ma’muriy javobgarlik to‘g‘risidagi kodeksining 79-moddasi (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) 1-qismi bilan 1,35 million so‘m jarima hamda o‘simlik dunyosiga 7,6 million so‘m yetkazilgan zarar miqdori belgilanib, chora ko‘rilgan.
Shuningdek, Toshkentning Mirzo Ulug‘bek tumanidagi “Lokomotiv” futbol maydoni yonidagi bog‘ hududida ta’mirlash ishlari olib borilmoqda. Ta’kidlanishicha, Butunjahon tozalik kuni munosabati bilan o‘tgan 2021-yil ushbu bog‘ hududida Davlat ekologiya qo‘mitasi tashabbusi bilan ekologik aksiya o‘tkazilgan
“Bog‘ hududidagi mavjud barcha daraxtlar to‘liq xatlovdan o‘tkazilgan bo‘lib, xavotirga o‘rin yo‘qligini, ushbu hudud ekologlarning qat’iy nazorati ostiga olinganligini ma’lum qilamiz”, — deyiladi xabarda.
“Kun.uz”ning bog‘ hududidan yer sotib olib, qurilish qilmoqchi bo‘lgan Xitoyning Wan Li kompaniyasiga tayanib yozishicha, xatlangan 177 tup daraxtning 64 tupi bog‘ hududidan boshqa yerga ko‘chirib o‘tkazilgan. Kompaniya qurilish tugaguniga qadar hech qanday daraxtga zarar yetkazilmasligi, qayta ekilgan daraxtlar esa unib chiqquncha parvarish qilinishini ma’lum qilgan.
Abdulla Qodiriy istirohat bog‘i hududida mehmonxona qurilishi haqida 2019-yilning noyabrida ma’lum bo‘lgandi. O‘shanda Toshkent shahar hokimligi bu borada yapon kompaniyasi bilan kelishuvga erishilganini bildirgandi. Ushbu qaror ijtimoiy tarmoqlarda keng muhokamalarga sabab bo‘lgan, aksariyat ijtimoiy tarmoq foydalanuvchilari ushbu qarorni qoralagandi.
2019-yilda Abdulla Qodiriy nomini abadiylashtirish, uning nomidagi majmua va uy-muzeyni zamonaviy talablar va milliy an’analar asosida barpo etishga qaratilgan loyihani amalga oshirish natijasida hozirda deyarli e’tibordan chetda qolgan hududda “Abdulla Qodiriy majmuasi” timsolida etnobog‘ va etnoshaharcha barpo etilishi aytilgandi. 2021-yilning bahorida bog‘ hududida Hampton by Hilton mehmonxonasi qurilishi ma’lum bo‘ldi.
Izoh (0)