O‘zbekistonda ichki ishlar organlariga imkoniyati cheklangan fuqarolarning ham ishga kirishi yo‘lga qo‘yildi

“Ichki ishlar organlarining ekspert-kriminalistika faoliyatini zamonaviy ilm-fan yutuqlarini keng joriy etgan holda yanada takomillashtirish chora-tadbirlari to‘g‘risida”gi qarorga muvofiq, tug‘ma nogironligi bo‘lgan shaxslar IIVning kriminalistika yo‘nalishiga qabul qilinadi. Bu haqda “Yoshlar” telekanali orqali efirga uzatilgan lavhada ma’lum qilindi.

“Bu insonlarga kerakli nafaqa tayinlangan. Ularning orasiga kirib o‘rganganimizda shu narsa ma’lum bo‘ldiki, bularga berilayotgan nafaqalar ularni jamiyatning bir a’zosi sifatida ehtiyojlarini qondirmaydi. Ya’ni bu fuqarolarda jamiyatda boshqalar kabi mehnat qilib, o‘zi pul topib, davlatimiz rivojlanishiga hissa qo‘shish xohishi bor. Xudo bir tomonidan qisgan bo‘lsa, ikkinchi tomonidan iste’dod bergan. Bu iste’dodlar aynan bizning kriminalistikadagi ziyraklik, sinchkovlik va ziyraklik amaliyotida qo‘l keladi”, — deydi IIV Ekspert kriminalistika bosh markazi boshlig‘i Saidolim Nuriddinov.

Uning so‘zlariga ko‘ra, shu maqsadda ushbu shaxslarni mutaxassis yoki texnik ishchi sifatida ekspertlik bo‘linmalariga shartnoma asosida jalb etish amaliyotini yo‘lga qo‘yish topshirig‘i berilgan.

Ta’kidlash kerakki, prezident qarori bilan ichki ishlar organlarining ekspert-kriminalistika bo‘linmalariga ekspert-kriminalistika sohasida jismoniy va yuridik shaxslarga shartnoma asosida ekspertlik, biometrik identifikatsiya, ilmiy-tadqiqot va axborot xizmatlarini hamda sohaga oid boshqa pullik xizmatlarni ko‘rsatish huquqi berilgan.