O‘zbekistonda hokimlar yil oxiriga qadar chorvachilik yo‘nalishida 100 ming aholining bandligini ta’minlaydi

Shavkat Mirziyoyev 16-fevral kuni chorvachilik tarmog‘ini qo‘llab-quvvatlash yuzasidan o‘tkazgan videoselektor yig‘ilishida chorvachilikning ozuqa bazasini mustahkamlash masalasiga alohida to‘xtalib o‘tdi. Bu haqda prezident matbuot kotibi xabar qildi.

Qayd etilishicha, viloyat hokimlariga 2 million gektar suvli yer maydonining kamida 10 foiziga beda va chorva ozuqa ekinlarini almashlab ekishni ta’minlash vazifasi qo‘yilgan. Shuningdek, foydalanishdan chiqqan va yangi yerlarni o‘zlashtirish hisobiga yirik chorva komplekslari tashkil etiladi.

Bunda Qiziltepada “Yangi asr” chorvachilik xo‘jaligi misoli aytib o‘tilgan. Xo‘jalik 2021-yilda ming gektar cho‘l yerlarini o‘zlashtirib, 2 ming boshli chorva kompleksi va kuniga 40 tonna sutni qayta ishlash sexini ishga tushirgan. 2022-yilda qo‘shimcha ming gektar yerni o‘zlashtirib, yomg‘irlatib va tomchilatib sug‘orish texnologiyasini o‘rnatgan holda elita urug‘chiligini tashkil etishni rejalashtirgan hamda suv tejash texnologiyasi yordamida arpa va makkajo‘xori kabi ozuqabop ekinlarni oralatib ekkan.

Suvni tejash texnologiyalari yordamida ozuqa ekinlari yetishtirishni yo‘lga qo‘ygan xo‘jaliklarni qo‘llab-quvvatlash uchun ularga:

• har bir gektar uchun 8 million so‘m subsidiya beriladi;
• xorijiy kreditlar 10 yil muddatga 3 yil imtiyozli davr bilan ajratiladi;
• kredit foizining 14 foizdan oshadigan qismiga kompensatsiya va kredit summasining 50 foiziga kafillik beriladi;
• go‘sht va sut uchun budjet hisobidan beriladigan subsidiya miqdori 2 baravarga oshiriladi.

Prezident 2022-yilda xalqaro moliya tashkilotlaridan 500 million dollar jalb etib, chorvachilikni rivojlantirish loyihalariga yo‘naltirish zarurligini qayd etgan.