Ўзбекистонда ҳокимлар йил охирига қадар чорвачилик йўналишида 100 минг аҳолининг бандлигини таъминлайди

Шавкат Мирзиёев 16 февраль куни чорвачилик тармоғини қўллаб-қувватлаш юзасидан ўтказган видеоселектор йиғилишида чорвачиликнинг озуқа базасини мустаҳкамлаш масаласига алоҳида тўхталиб ўтди. Бу ҳақда президент матбуот котиби хабар қилди.

Қайд этилишича, вилоят ҳокимларига 2 миллион гектар сувли ер майдонининг камида 10 фоизига беда ва чорва озуқа экинларини алмашлаб экишни таъминлаш вазифаси қўйилган. Шунингдек, фойдаланишдан чиққан ва янги ерларни ўзлаштириш ҳисобига йирик чорва комплекслари ташкил этилади.

Бунда Қизилтепада «Янги аср» чорвачилик хўжалиги мисоли айтиб ўтилган. Хўжалик 2021 йилда минг гектар чўл ерларини ўзлаштириб, 2 минг бошли чорва комплекси ва кунига 40 тонна сутни қайта ишлаш цехини ишга туширган. 2022 йилда қўшимча минг гектар ерни ўзлаштириб, ёмғирлатиб ва томчилатиб суғориш технологиясини ўрнатган ҳолда элита уруғчилигини ташкил этишни режалаштирган ҳамда сув тежаш технологияси ёрдамида арпа ва маккажўхори каби озуқабоп экинларни оралатиб эккан.

Сувни тежаш технологиялари ёрдамида озуқа экинлари етиштиришни йўлга қўйган хўжаликларни қўллаб-қувватлаш учун уларга:

• ҳар бир гектар учун 8 миллион сўм субсидия берилади;
• хорижий кредитлар 10 йил муддатга 3 йил имтиёзли давр билан ажратилади;
• кредит фоизининг 14 фоиздан ошадиган қисмига компенсация ва кредит суммасининг 50 фоизига кафиллик берилади;
• гўшт ва сут учун бюджет ҳисобидан бериладиган субсидия миқдори 2 бараварга оширилади.

Президент 2022 йилда халқаро молия ташкилотларидан 500 миллион доллар жалб этиб, чорвачиликни ривожлантириш лойиҳаларига йўналтириш зарурлигини қайд этган.