Shavkat Mirziyoyev raisligida o‘tkazilayotgan mashinasozlik sanoatiga doir yig‘ilishda soha mas’ullariga bir qator ko‘rsatmalar berildi. Bu haqda prezident matbuot kotibi Sherzod Asadov xabar qildi.
Qayd etilishicha, prezident “O‘zavtosanoat” AJ raisi Shavkat Umurzoqovga ishlab chiqarishni oshirish va aholining talabini to‘liq qondirish bo‘yicha tinimsiz ishlashi shartligini ko‘rsatib o‘tgan.
Shuningdek, jahonda mikrochiplar ishlab chiqarish va xalqaro logistika bilan bog‘liq muammolardan kelib chiqib yangi yondashuv va yechimlar topish zarurligi ta’kidlangan. Mashinasozlik tarmog‘i sanoatning “drayver” sohalaridan biri bo‘lishi kerakligi aytilgan.
Bu borada besh yillik taraqqiyot strategiyasida avtomobil ishlab chiqarishni 1,4 barobarga, eksportini esa 2 barobarga oshirish belgilab olingan.
Shu munosabat bilan 1-mayga qadar avtomobil xarididagi navbatlarni to‘liq bartaraf etish, UzAuto Motors avtomobillari uchun oldindan to‘lov miqdorini 85 foizdan 50 foizgacha pasaytirish vazifasi qo‘yilgan.
Shuningdek, Shavkat Umurzoqov zimmasiga bir hafta muddatda avtomobil savdosida ochiq-oshkora va inson omilidan xoli tizimni yo‘lga qo‘yib, sun’iy navbatlar va korrupsion holatlarni tag-tomiri bilan yo‘q qilish uchun shaxsiy javobgarlik yuklangan.
Izoh (0)