Самбо бўйича жаҳон чемпиони Камолиддин Расулов ўлимида айбланаётган фуқаро иши судда кўриб чиқилмоқда

Самбо бўйича жаҳон чемпиони, қашқадарёлик спортчи Камолиддин Расулов ўлимида айбланаётган фуқаро иши судда кўриб чиқилмоқда. Бу ҳақда «Дарё»га марҳумнинг турмуш ўртоғи Гулноза Холмуродова хабар берди.

Маълум қилинишича, мазкур қотиллик иши бўйича дастлабки суд мажлиси 2022 йилнинг 8 февраль куни Жиноят ишлари бўйича Учтепа туман суди биносида бўлиб ўтган.

«Дастлабки суд мажлисида айбланувчи Ш.Т. сўз олиб, воқеани ўз талқини бўйича сўзлаб берди. Унинг биринчи гапи иккинчисига қовушмаяпти. Айтаётган сўзлари ўлда-жўлда. Шунингдек, менинг иккита саволимга ҳам тайинли жавоб бермади», — дейди жабрланувчи Гулноза Холмуродова.

Марҳумнинг хотинига кўра, у судда айбланувчига юзланиб, турмуш ўртоғи уни дори ичишга мажбурлаган ёки мажбурламагани, шунингдек, ўша дори унинг соғлиғига қай даражада таъсир этгани билан қизиққан.

«Айбланувчи дорини Камолиддин акамга ҳавас қилиб, ундаги спортчиларга хос ўзгаришларга ҳавас қилиб, ичганини ўз тили билан айтяпти. Лекин дори соғлиғига зарар берганини, ўлиши мумкинлигини қўшимча қилмоқда. Мана, соғсиз-ку, десам, ўлишдан қўрқиб юрибман деяпти», — дейди Гулноза Холмуродова.

Гулноза Холмуродованинг қўшимча қилишича, суд 2022 йилнинг 18 февраль куни соат 14:30 га қадар танаффус эълон қилган.

Эслатиб ўтамиз, аввалроқ қашқадарёлик жаҳон чемпиони 29 ёшли Камолиддин Расулов 2021 йилнинг 13 сентябрь куни соат 21:30 да Тошкент шаҳрининг Учтепа туманида бошқа бир спортчи томонидан пичоқлаб ўлдирилгани ҳақида хабар берилганди. Мазкур хабарни тасдиқлаган Бош прокуратура ахборот хизмати раҳбари Ҳаёт Шамсутдинов воқеа юзасидан Учтепа тумани прокуратураси томонидан Ш.Т.га нисбатан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, у Жиноят процессуал кодексининг 221-моддаси тартибида ушланганини билдирганди. Кейинчалик «Менинг юртим» телеканалининг «Марказий студия» кўрсатуви ижодкорлари жамоатчиликка воқеа содир бўлган ҳудуддаги кузатув камераларига тушиб қолган видеони эълон қилди. Унда яраланган спортчини икки киши қувлаб кетаётгани кўринган. Бу ҳақда «Дарё» мухбири билан суҳбатлашган марҳумнинг яқинлари ҳам «Ўша куни келинимиз воқеани кўрган. Укам яралангач, қочган. Ортидан эса икки киши қувган. Учинчи киши эса йўлини тўсиб, уни ушлаган», — деганди.