Ijtimoiy tarmoqlarda O‘zbekistonda endi kuryerlik kompaniyalar jo‘natma kimning nomiga bo‘lsa, har biri bilan videoaloqa o‘rnatib bojxona xizmatiga isbot sifatida ko‘rsatishi kerakligi to‘g‘risida xabarlar tarqaldi. Davlat bojxona qo‘mitasi mazkur holatga munosbat bildirdi.
Ma’lum qilinishicha, fuqarolarga jo‘natmalar orqali shaxsiy ehtiyoj uchun mo‘ljallangan tovarlarni qabul qilib olishlari uchun barcha qulayliklar yaratilgan. Prezidentning 2018-yil 6-fevraldagi “Jismoniy shaxslar tomonidan bojxona chegarasi orqali tovarlarni olib o‘tilishini yanada tartibga solish chora-tadbirlari to‘g‘risida” PQ-3512-son qaroriga muvofiq, jismoniy shaxslar xalqaro kuryerlik jo‘natmalarida uchun bir kalendar chorak mobaynida 1000 dollar qiymatidagi tovarlarni bojsiz qabul qilib olishlari mumkin.
Bojxona to‘lovlari undirilmaydigan me’yorlar doirasida olib kelingan har bir kuryerlik jo‘natmalarini bojxona nazorati va rasmiylashtiruvi jarayonida qabul qiluvchi jismoniy shaxs ishtirok etmasligi sababli ham haqiqatda jo‘natma o‘sha jismoniy shaxs nomiga keldimi, uning manziliga yetkazildimi-yo‘qmi buni nazorat qilish imkoniyati mavjud emas.
Tezkor o‘rganishlar jarayonida jinoiy guruhlar ayrim shaxslarning ishonchiga kirib aldov yo‘li bilan pasport ma’lumotlarini qo‘lga kiritgani, hattoki bir necha yil muqaddam vafot etgan yoki xorijga ishlash uchun ketgan fuqarolar pasport ma’lumotlaridan foydalanib ularning nomiga kuryerlik jo‘natmalari niqobi ostida tijorat maqsadiga mo‘ljallangan tovarlarni olib kirishga urinishgani ham aniqlangan.
Aslida tijorat uchun mo‘ljallangan tovarlarni go‘yoki shaxsiy foydalanish niqobi ostida olib kirishga urinishlar yashirin iqtisodiyotning rivojlanishiga, tartibsiz import faollashishiga va ichki bozorni nohalol tadbirkorlar tomonidan arzon (sifatsiz) import mahsulotlari bilan to‘ldirilishiga, shuningdek, davlat budjetiga undirilishi lozim bo‘lgan bojxona va soliq to‘lovlari bo‘yicha ko‘rsatkichlarni kamayishiga olib keladi.
“Shu boisdan mazkur muammoning oldini olish maqsadida, qanchalik qiyin bo‘lsa-da, ko‘p vaqt va resurs talab etsada, endilikda davlat bojxona xizmati organlari tomonidan har bir jo‘natma bilan indivudial tarzda shug‘ullanish yo‘lga qo‘yiladi. Jo‘natmada nomi qayd etilgan fuqaro nomiga rostdan ham xorijdan jo‘natma yuborilganmi-yo‘qmi, jo‘natmadagi tovarlar va ularning miqdori haqida fuqaro tasdiqlaganidan so‘nggina ushbu jo‘natmalar egasiga yetkazish uchun kuryerlik tashkilotiga topshiriladi”, — deyiladi munosabatda.
“Ta’kidlash joizki, xalqaro kuryerlik jo‘natmalari orqali jismoniy shaxslar nomiga yuborilayotgan tovarlar uchun bojsiz olib kirish me’yorini qisqartirish bo‘yicha Davlat bojxona qo‘mitasi tomonidan hech qanday normativ-huquqiy hujjat loyihasi ishlab chiqilmagan”, — deya qayd etiladi xabarda.
Davlat bojxona qo‘mitasi bojxona organlari faoliyatiga doir xolis va haqqoniy xabarlarni e’lon qilishda ommaviy axborot vositalari, keng jamoatchilik vakillari bilan o‘zaro hamkorlikka doimo tayyor ekanini ma’lum qiladi.
Eslatib o‘tamiz, 2021-yilning dekabrida hukumat qarori bilan Xalqaro pochta va kuryerlik jo‘natmalarini bojxona nazorati va rasmiylashtiruvidan o‘tkazish tartibi to‘g‘risidagi nizom tasdiqlangandi. Nizomga ko‘ra, xalqaro pochta jo‘natmalariga ishlov berish, ularni bojxona organlari tomonidan nazorat qilish xalqaro pochta almashinuvi joylarida amalga oshiriladi.
Izoh (0)