Ижтимоий тармоқларда Ўзбекистонда энди курьерлик компаниялар жўнатма кимнинг номига бўлса, ҳар бири билан видеоалоқа ўрнатиб божхона хизматига исбот сифатида кўрсатиши кераклиги тўғрисида хабарлар тарқалди. Давлат божхона қўмитаси мазкур ҳолатга муносбат билдирди.
Маълум қилинишича, фуқароларга жўнатмалар орқали шахсий эҳтиёж учун мўлжалланган товарларни қабул қилиб олишлари учун барча қулайликлар яратилган. Президентнинг 2018 йил 6 февралдаги «Жисмоний шахслар томонидан божхона чегараси орқали товарларни олиб ўтилишини янада тартибга солиш чора-тадбирлари тўғрисида» ПҚ-3512-сон қарорига мувофиқ, жисмоний шахслар халқаро курьерлик жўнатмаларида учун бир календарь чорак мобайнида 1000 доллар қийматидаги товарларни божсиз қабул қилиб олишлари мумкин.
Божхона тўловлари ундирилмайдиган меъёрлар доирасида олиб келинган ҳар бир курьерлик жўнатмаларини божхона назорати ва расмийлаштируви жараёнида қабул қилувчи жисмоний шахс иштирок этмаслиги сабабли ҳам ҳақиқатда жўнатма ўша жисмоний шахс номига келдими, унинг манзилига етказилдими-йўқми буни назорат қилиш имконияти мавжуд эмас.
Тезкор ўрганишлар жараёнида жиноий гуруҳлар айрим шахсларнинг ишончига кириб алдов йўли билан паспорт маълумотларини қўлга киритгани, ҳаттоки бир неча йил муқаддам вафот этган ёки хорижга ишлаш учун кетган фуқаролар паспорт маълумотларидан фойдаланиб уларнинг номига курьерлик жўнатмалари ниқоби остида тижорат мақсадига мўлжалланган товарларни олиб киришга уринишгани ҳам аниқланган.
Аслида тижорат учун мўлжалланган товарларни гўёки шахсий фойдаланиш ниқоби остида олиб киришга уринишлар яширин иқтисодиётнинг ривожланишига, тартибсиз импорт фаоллашишига ва ички бозорни ноҳалол тадбиркорлар томонидан арзон (сифатсиз) импорт маҳсулотлари билан тўлдирилишига, шунингдек, давлат бюджетига ундирилиши лозим бўлган божхона ва солиқ тўловлари бўйича кўрсаткичларни камайишига олиб келади.
«Шу боисдан мазкур муаммонинг олдини олиш мақсадида, қанчалик қийин бўлса-да, кўп вақт ва ресурс талаб этсада, эндиликда давлат божхона хизмати органлари томонидан ҳар бир жўнатма билан индивудиал тарзда шуғулланиш йўлга қўйилади. Жўнатмада номи қайд этилган фуқаро номига ростдан ҳам хориждан жўнатма юборилганми-йўқми, жўнатмадаги товарлар ва уларнинг миқдори ҳақида фуқаро тасдиқлаганидан сўнггина ушбу жўнатмалар эгасига етказиш учун курьерлик ташкилотига топширилади», — дейилади муносабатда.
«Таъкидлаш жоизки, халқаро курьерлик жўнатмалари орқали жисмоний шахслар номига юборилаётган товарлар учун божсиз олиб кириш меъёрини қисқартириш бўйича Давлат божхона қўмитаси томонидан ҳеч қандай норматив-ҳуқуқий ҳужжат лойиҳаси ишлаб чиқилмаган», — дея қайд этилади хабарда.
Давлат божхона қўмитаси божхона органлари фаолиятига доир холис ва ҳаққоний хабарларни эълон қилишда оммавий ахборот воситалари, кенг жамоатчилик вакиллари билан ўзаро ҳамкорликка доимо тайёр эканини маълум қилади.
Эслатиб ўтамиз, 2021 йилнинг декабрида ҳукумат қарори билан Халқаро почта ва курьерлик жўнатмаларини божхона назорати ва расмийлаштирувидан ўтказиш тартиби тўғрисидаги низом тасдиқланганди. Низомга кўра, халқаро почта жўнатмаларига ишлов бериш, уларни божхона органлари томонидан назорат қилиш халқаро почта алмашинуви жойларида амалга оширилади.
Изоҳ (0)