Farg‘ona viloyatining Quvasoy shahrida itlar ommaviy o‘ldirilgani aytilmoqda. “Mehr va Oqibat” hayvonlarni himoya qilish jamiyati ma’lumotlariga ko‘ra, o‘nlab hayvonlar chiqindixonada otib tashlangan.
Ma’lum qilinishicha, “Mehr va Oqibat” direktori nomiga Quvasoy shahrida itlarga nisbatan shafqatsiz munosabatda bo‘lish va ularning o‘ldirilishiga oid ariza kelib tushgan. Ariza muallifining yozishicha, 2022-yilning 25-yanvar kuni mahalla qo‘mitasi raisi va ikki nafar “uchastkovoy” noma’lum shaxslar va Boshpanasiz hayvonlarni tutish xizmati Quvasoy bo‘limi xodimlari hamrohligida taxminan o‘nlab itlarni, xususan, bo‘yinbog‘i bor uy hayvonlarini tutgan.
Aholining so‘zlariga ko‘ra, ushlangan hayvonlar chiqindi tashishga mo‘ljallangan mashinaga yuklangan va o‘ldirilgan. Hayvonlarni himoya qilishga uringan fuqarolar “turtib yuborilgan hamda ularga nisbatan qo‘pollik va tahdid qilingan”.
“Bu vaqtda yaqin atrofga qo‘yilgan ‘Jiguli’da uchta qurol bor edi. Mashina ochiq va uni hech kim qo‘riqlamayotgandi. Keyinroq tutilgan itlar chiqindixonada otib tashlangan”, — deyiladi murojaatda.
O‘z navbatida “Mehr va Oqibat” rahbariyati O‘zbekiston Ichki ishlar vazirligiga aybdorlarga nisbatan qonun doirasida chora ko‘rishlik uchun iltimosnoma yo‘llagan.
Eslatib o‘tamiz, 2021-yilning aprelida “Mehr va oqibat” hayvonlarni himoya qilish jamiyati viloyatlar veterinarlarini Toshkentdagi xususiy klinikalarda boshpanasiz it va mushuklarni sterilizatsiya hamda kastratsiya qilish (bichish) bo‘yicha o‘qitish loyihasini ishga tushirgandi.
Mavzuga doir:
- “Uxlatadigan dori yo‘qligi uchun itlarni otib o‘ldiramiz”. O‘zbekistonda qarovsiz hayvonlarga munosabat qachon o‘zgaradi?
- O‘zbekistonlik ekologlar boshpanasiz hayvonlar bilan ishlashni takomillashtirishga oid prezident qarori loyihasini tayyorlamoqda
- O‘zbekistonda hayvonlarga nisbatan shafqatsiz munosabatda bo‘lganlik uchun jinoiy javobgarlik kuchga kirdi
Izoh (0)