O‘zbekistondan Rossiyaga olib ketilayotgan trikotaj mahsulotlari ortilgan fura Nur-Sulton—Pavlodar trassasida yonib ketdi, deb xabar beradi “KazTAG”.
Ma’lum qilinishicha, 12-fevral kuni mahalliy vaqt bilan soat 01:38 da Nur-Sulton—Pavlodar avtomobil yo‘lida yuk mashinasida yong‘in kelib chiqqani haqida xabar kelib tushgan. Pavlodar viloyati Favqulodda vaziyatlar boshqarmasining ma’lumotlariga ko‘ra, 2010-yilda ishlab chiqarilgan Renault Premium yuk mashinasi butunlay yonib ketgan.
Ta’kidlanishicha, yuk mashinasi O‘zbekistondan Rossiyaga ketayotgan bo‘lgan. Furani boshqargan ikki haydovchi Qalqaman qishlog‘idagi issiqlik punktiga yetkazilgan. Hodisa oqibatida qurbonlar va jarohatlanganlar yo‘q.
Ko‘ngilsiz hodisaga elektr simlarining qisqa tutashuvi sabab bo‘lgani aytilmoqda, hozirda keltirilgan zarar miqdori o‘rganilmoqda.
Eslatib o‘tamiz, 2021-yilning dekabrida Qozog‘istonda ichida o‘zbekistonliklar bo‘lgan avtobus Mercedes bilan avariyaga uchragandi. YTH oqibatida Mercedes’da bo‘lgan uch kishi halok bo‘lgan, jumladan, avtobusning yengil mashina ustiga qulashi oqibatida qisilib qolgan bir qiz. Uning jasadi avtobus ko‘tarilganidan so‘nggina chiqarib olingan. Keyinroq Mercedes mashinasida haydovchining rafiqasi va ikki yo‘lovchi halok bo‘lgani ma’lum bo‘lgan.
Izoh (0)