Ўзбекистондан Россияга олиб кетилаётган трикотаж маҳсулотлари ортилган фура Нур-Султон—Павлодар трассасида ёниб кетди, деб хабар беради «КазТАГ».
Маълум қилинишича, 12 февраль куни маҳаллий вақт билан соат 01:38 да Нур-Султон—Павлодар автомобиль йўлида юк машинасида ёнғин келиб чиққани ҳақида хабар келиб тушган. Павлодар вилояти Фавқулодда вазиятлар бошқармасининг маълумотларига кўра, 2010 йилда ишлаб чиқарилган Renault Premium юк машинаси бутунлай ёниб кетган.
Таъкидланишича, юк машинаси Ўзбекистондан Россияга кетаётган бўлган. Фурани бошқарган икки ҳайдовчи Қалқаман қишлоғидаги иссиқлик пунктига етказилган. Ҳодиса оқибатида қурбонлар ва жароҳатланганлар йўқ.
Кўнгилсиз ҳодисага электр симларининг қисқа туташуви сабаб бўлгани айтилмоқда, ҳозирда келтирилган зарар миқдори ўрганилмоқда.
Эслатиб ўтамиз, 2021 йилнинг декабрида Қозоғистонда ичида ўзбекистонликлар бўлган автобус Mercedes билан аварияга учраганди. ЙТҲ оқибатида Mercedes’да бўлган уч киши ҳалок бўлган, жумладан, автобуснинг енгил машина устига қулаши оқибатида қисилиб қолган бир қиз. Унинг жасади автобус кўтарилганидан сўнггина чиқариб олинган. Кейинроқ Mercedes машинасида ҳайдовчининг рафиқаси ва икки йўловчи ҳалок бўлгани маълум бўлган.
Изоҳ (0)