Prezident Shavkat Mirziyoyev boshchiligida o‘tkazilayotgan videoselektor yig‘ilishida yo‘llar holati va infratuzilmasi ko‘p hollarda yo‘l harakatidagi muammolar, qoidabuzarliklar va avariyalarga sabab bo‘layotgani qayd etildi. Bu haqda davlat rahbarining matbuot kotibi Sherzod Asadov ma’lum qildi.
Ta’kidlanishicha, transport serqatnov bo‘lgan 2 mingdan ortiq chorraha va 9,5 mingta piyoda o‘tish joylari svetofor yoki boshqa vositalar bilan jihozlanmagan. Aholi punktlari uchun 15 ming kilometrga yaqin piyoda va veloyo‘laklar yetishmaydi.
“Kecha Samarqand shahridagi 59-sonli ko‘zi ojizlar maxsus maktabida ovozli maxsus svetoforlar o‘rnatilganini ko‘rdim. Bunday tajribani barcha hududlarda joriy etishimiz shart. Shu bois 2021-yilda yo‘l infratuzilmasini yaxshilash, svetofor, belgilar bo‘yicha aholidan 10 mingdan ziyod murojaatlar kelib tushgan”, — deydi davlat rahbari.
Ayniqsa, Toshkent shahri, Buxoro, Qashqadaryo Samarqand, Sirdaryo, Xorazm va Toshkent viloyatlarida bu muammo dolzarb bo‘lib, piyoda ishtirokidagi avariyalar qolgan hududlardan yuqori.
Shuningdek, Qoraqalpog‘iston, Buxoro, Namangan, Navoiy, Jizzax, Qashqadaryo, Samarqand, Surxondaryo viloyatlarida eng ko‘p avariyalar sodir bo‘layotgan 2,2 ming kilometr xalqaro yo‘llar qarama-qarshi yo‘nalishlarni ajratuvchi to‘siq bilan jihozlanmagani ta’kidlandi.
“Yo‘llardagi mavjud 400 mingta yo‘l belgilari va ko‘rsatkichlarining yarmi talabga javob bermaydi. Misol uchun, birgina Toshkent shahrida 15 mingta yo‘l belgilari yetishmaydi, 22 mingtasini yangilash talab etiladi”, — deyiladi xabarda.
Avvalroq O‘zbekistonda qoidabuzar haydovchilar uchun jarima ballari tizimi joriy etilishi to‘g‘risida xabar berilgandi.
Izoh (0)