Сан-Паулу (Бразилия) штати полицияси «ПСЖ» ҳужумчиси Неймарнинг банк ҳисоб рақамидан пул ўғирлаган шахсни қўлга олди.
Marca нашрининг ёзишича, 20 ёшли талончи футболчидан, тахминан, 220 минг реал (деярли 37 минг евро) ўғирлаган.
Айбланувчи маҳаллий компаниялардан бирида маъмурий ёрдамчи бўлиб ишлаган. Унинг ноқонуний операциялар орқали фирибгарлик билан шуғулланадиган жиноий гуруҳ таркибида бўлгани айтилмоқда.
Шунингдек, расмийлар фирибгарликка алоқадор бошқа шахсларни ҳам аниқлаганини маълум қилган.
Эслатиб ўтамиз, Неймар ноябрь ойининг охиридан бери тўпиғидаги жароҳати сабаб майдонга тушмаяпти. У 10 февраль куни умумий машғулотларга қўшилган. Шунга қарамай, унинг Чемпионлар Лигаси 1/8 финали доирасида 15 февраль куни бўлиб ўтадиган «Реал»га қарши ўйинни ўтказиб юбориши мумкинлиги ҳақида хабарлар янграмоқда.
Бразилиялик ҳужумчи Франция чемпионатининг 10 ўйинида 3 тадан гол ва голли узатмага муаллифлик қилди.
Изоҳ (0)