“Liverpul” futbolchisi Sadio Mane jamoani tark etmoqchi.
Goal’ning xabar berishicha, hujumkor yarim himoyachi “Real” yoki “Barselona”dan taklif tushsa, ingliz klubini tark etishga tayyor. Mane bu haqida o‘z agentlarini ogohlantirgan. Ikkala jamoadan birida o‘ynash futbolchining bolalikdagi orzusi hisoblanadi.
Manening mersisaydliklar bilan shartnomasi 2023-yil yozida o‘z nihoyasiga yetadi. Klub Sadioga yangi shartnoma taklif qilmay, uning transferidan pul ishlab olmoqchi bo‘lsa, 2022-yil yozida uni sotib yuborishga majbur.
Futbolchining “Liverpul”ni tark etishiga yana bir sabab — u Afrika tarixidagi eng yaxshi futbolchi bo‘lish uchun kurashmoqchi. Mane “Liverpul”da o‘zining eng yuqori cho‘qqisiga chiqib bo‘ldi, deb hisoblaydi. Boshqa jamoaga o‘tish unga Chempionlar Ligasini ikkinchi bor qo‘lga kiritish, shu orqali Samyuel Eto’O, Didye Drogba va Jorj Vealar qatoriga qo‘shilish imkoniyatini beradi.
Mane va “Liverpul” hozirda yangi shartnoma borasida muzokaralar o‘tkazmayapti. Undan tashqari “qizillar”ning yangi futbolchisi Luis Dias Sadioning pozitsiyasida to‘p suradi.
Qayd etish joiz, “Real” 2017 va 2019-yillarda Maneni o‘z safiga qo‘shib olish uchun urinib ko‘rgan.
2021/22-yilgi mavsumda 29 yoshli futbolchi “Liverpul”ning barcha musobaqalardagi 26 o‘yinida ishtirok etib, 10 ta gol va bitta golli uzatmani o‘z hisobiga yozdirib qo‘ydi.
Izoh (0)