Andijon viloyati Qo‘rg‘ontepa tumani hokimi Elyorbek Nabijonov bir guruh jurnalist va blogerlar bilan ochiq muloqot o‘tkazdi.
Muloqotda “Daryo” muxbiri Elyorbek Nabijonov hokim bo‘lishidan avval Qo‘rg‘ontepa tumanidagi katta korxonaning egasi bo‘lgani va bu hududda manfaatlar to‘qnashuviga sabab bo‘lmayaptimi, deb savol bilan murojaat qildi. Savolga hokim Elyorbek Nabijonov javob berar ekan, tadbirkorning hokim etib tayinlanishi ko‘proq foyda keltirayotganini aytib o‘tdi.
“Manfaatlar to‘qnashuvi bo‘lyapti deb aytolmayman. Aksincha, tadbirkor tadbirkorni tushunadi. Hokim bo‘lganimda birinchi galda korrupsiyaga qarshi kurashishga kirishdim. Fermerlarni yig‘ib, ularga yer olib, yer berish uchun kelmaganimni aytdim. Qaytaga, tadbirkor sifatida tajribalarim bilan o‘rtoqlashishni taklif qildim va shu yo‘lda ishlayapmiz. Tadbirkorlarga ishlab chiqarishda yanada ko‘proq foyda olish va yangi texnologiyalarni o‘zlashtirish yo‘lidan boryapmiz. Tumanda nima ish qilayotgan bo‘lsam, rivojlangan davlatlarda ko‘rganlarimni tatbiq etyapman”, — dedi Qo‘rg‘ontepa tumani hokimi.
Suhbat davomida Elyorbek Nabijonov tuman hokimlarining saylov yo‘li bilan tayinlanishiga o‘z munosabatini bildirdi.
“Saylovdan umuman qo‘rqmayman. Fikrimcha, agar tuman hokimligiga saylov bo‘lsa, odamlar meni saylasa kerak”, — dedi u.
Elyorbek Nabijonov 2021-yil fevral oyida Qo‘rg‘ontepa tumani hokimi vazifasiga tayinlangan. Tayinlovga qadar Khantex Group MChJ kuzatuv kengashi raisi bo‘lgan. U 2020-yilda “Shuhrat” medali bilan taqdirlangan.
Izoh (0)