“E-qaror” — Mahalliy davlat hokimiyat organlari tomonidan qabul qilinadigan qarorlarni ishlab chiqish, kelishish va ro‘yxatdan o‘tkazishning yagona elektron tizimi ko‘pchilikka yoqmayapti. Bu haqda O‘zbekiston adliya vaziri Ruslanbek Davletov 7-fevral kuni bo‘lib o‘tgan jamoatchilikka bergan an’anaviy yillik hisoboti davomida aytib o‘tdi, deb xabar beradi “Daryo” muxbiri.
“Barcha hokimliklarning qarorlari “E-qaror” tizimida shaffof chiqishni boshladi. Uni hamma ko‘rib, rezonanslar bo‘lishni boshladi. Budjetdan qancha pul ajratilayotgani ko‘rinyapti. Bizga ham buni nazorat qilish oson bo‘ldi. Avval borib tekshirardik, qog‘oz hujjatni olib yurish kerak edi. Endi biz barchasini ko‘rib turamiz. Yopiq hujjatlar ham bor, masalan, vasiyatnoma va boshqalar. Shu kabi mahalliy budjet xarajatlarni ham yopish kabi holatlar bor. Ular buni ko‘rsatgisi kelmaydi-da, ‘bitta haykalga shuncha pulmi?’, deb jamoatchilik ko‘tarishini biladi-da”, — deydi u.
Ruslanbek Davletov bu kabi masalalarni ko‘tarish kerakligi haqida aytib o‘tdi. Uning ta’kidlashicha, “balki biz bu orqali qadriyatlarizni to‘g‘ri yo‘lga qo‘yib olarmiz”.
“Ya’ni qaysi tomonga pul ketkazish kerakligini. Haykal ham kerakdir, lekin boshqa yo‘nalishlarda ham kerak bo‘lishi mumkin. Ko‘p odamga ham ‘E-qaror’ tizimi yoqmayapti. Biz bu borada qattiq turibmiz. Shundan kelib chiqib bu tizimni vazirliklarga ham tadbiq qilmoqchimiz. Vazirliklar ham juda ko‘p pul sarflaydi, ‘juda ko‘p ishlarni qiladi’”, — deydi adliya vaziri.
Ruslanbek Davletovning qo‘shimcha qilishicha, hokimliklarning 2500ta noqonuniy qarori aniqlangan. “Bu juda katta raqam”, deydi vazir.
Hokimliklardan ma’muriy islohotlar so‘ralganda, Adliya vazirligi tanqid qilingani ham qayd etildi.
“Ayrim hokimlar aytyapti, ‘bu Adliya tizimidagilar faqat sakkiz soat ishlaydi, boshqa ish qilmaydi’. Qonun bo‘yicha o‘zi 8 soat ishlanishi kerak-ku, ko‘ryapsizmi, ayrim rahbarlarning qadriyatlari qanday? Konstitutsiyada yozilgan mehnat huquqi bo‘lsa, Mehnat kodeksida yozilgan normalar bo‘lsa, 8 soat ishlashni tanqid sifatida majlislarda gapirish — bu endi qay darajada qoloqlikdan iborat bo‘lgan hodisa ekanini anglatadi. Har doim aytamiz, hududlardagi yoki sohadagi rahbarlar hudud yoki sohadagi bek emas, o‘zi xalqning yollanma ishchisi ekanini tan olsa, qadami o‘zgaradi. Biz ham yollanma ishchimiz. Qonun turibdi va qonundan hech kim ustun bo‘lolmaydi”, — deydi Ruslanbek Davletov.
Izoh (0)