АОКАда 7 февраль куни ўтказилган брифингда «Ўзсувтаъминот» АЖ ахборот хизмати раҳбари Акмал Муродов 2021 йилда аҳоли пунктларида ичимлик сув таъминоти ва оқова сув чиқариш тизимларини ривожлантириш бўйича амалга оширилган ишлар ҳақида маълумот берди.
Қайд этилишича, бугунги кунда республика аҳолисининг марказлашган ичимлик суви билан таъминланганлик даражаси 69,7 фоизни ташкил этмоқда. 30,3 фоиз аҳоли ичимлик суви билан таъминланишда муқобил сув манбаларидан фойдаланади. Шу жумладан, 9 фоиз аҳолига ичимлик суви махсус сув ташувчи транспорт воситалари орқали етказиб берилади. Булар, асосан, ичимлик суви манбаи бўлмаган ҳудудлар ҳисобланади.
2021 йилда аҳоли пунктларида ичимлик суви таъминоти ва оқова сув чиқариш тизимларини ривожлантириш мақсадида 649 та объектда қуриш ва реконструкция ишларини амалга оширилган. Бу учун жами 2 триллион 328,7 миллиард сўм миқдорда маблағ ўзлаштирилган.
Ушбу маблағлар ҳисобидан 5,3 минг километр ичимлик ва 303,2 километр оқова сув тармоқлари тортилган. 474 та ичимлик ва оқова сув иншоотида қуриш ҳамда реконструкция қилиш ишлари бажарилган.
Хусусан, президентнинг 2021 йил 2 апрелдаги «Обод қишлоқ» ва «Обод маҳалла» дастурларини амалга ошириш бўйича қўшимча чора-тадбирлар тўғрисидаги қарори ижроси доирасида 944 миллиард сўм маблағ ўзлаштирилган. Ҳар бир маҳалланинг ўзига хос хусусиятлари, ичимлик суви билан таъминланганлик ва оқова сув хизматлари билан қамраб олинганлик даражаси таҳлил қилинган. 352 та маҳаллада 3 890,9 километр ичимлик ва 77,7 километр оқова сув тармоқларини қуриш ҳамда реконструкция қилиш ишлари амалга оширилган. 278 та объект фойдаланишга топширилган.
2020 йил 1 январь ҳолатига кўра, ичимлик суви билан тўлиқ таъминланган маҳаллаларнинг сони 2841 тани ташкил этган. Бугунги кунга келиб бундай маҳаллаларнинг сони 3829 тани кўрсатмоқда. Сўнгги икки йилда ичимлик суви билан тўлиқ таъминланган маҳаллаларнинг сони 35 фоизга, яъни 988 тага ошган.
Шунингдек, ўтган йилда Оролбўйи минтақасини ривожлантириш мақсадида 97 миллиард сўм миқдорда маблағ ўзлаштирилиб, 52 та ичимлик ва оқова сув объектларида қурилиш ва реконструкция ишлари амалга оширилган. Маблағлар ҳисобидан 372,3 километр ичимлик ва 7,1 километр оқова сув тармоқлари қурилган ва реконструкция қилинган. 40 та объект фойдаланишга топширилган.
2021 йилда амалга оширилган ишлар натижасида 1,5 миллион нафар аҳоли илк бор марказлашган ичимлик сув билан таъминланган. 2,3 миллион нафар аҳолининг ичимлик суви таъминоти яхшиланган.
Изоҳ (0)