Ўзбекистон бўйлаб коронавирус инфекциясига қарши эмланган фуқаролар ўртасида ютуқли ўйинлар ташкил қилиниши ва бош совринга автомобиль қўйилиши тўғрисида хабар берилганди. Блогер ва ҳуқуқшунос Хушнуд Худойбердиевнинг ёзишича, 29 январь куни Zo‘r TV каналида автомобиль совринининг илк ғолиб аниқланган.
Маълум қилинишича, 15 январдан бошлаб мамлакатда «Вакцина — тўғри танлов» ютуқли ўйинлари ташкил этилмоқда ва у 5 ой давомида ўтказилади. Унга кўра, ҳар ҳафта 35 та велосипед, 25 та телевизор, 25 та смартфон ва 25 та планшет ўйналади. Ҳар ойнинг сўнгги шанба кунида эса супер-ютуқ — Malibu автомобили ўйналади.
29 январь куни Zo‘r TV телеканалида орқали ўтказилган ўйинда илк ғолиб аниқланди — Фарғонанинг Фурқат туманидан Баҳодиржон Эсоналиев Халилжон ўғли Malibu эгасига айланган.
Маълумот учун, 2022 йил 15 январдан бошлаб вакцина олган барча фуқаролар автоматик равишда ютуқли ўйин иштирокчисига айланишади, қўшимча равишда бирор жойдан рўйхатдан ўтиш шарт эмас. Вакцина турининг фарқи йўқ, исталганини олса ҳисоб. Қайси дозалигининг ҳам фарқи йўқ.
Аввалроқ Ўзбекистон Соғлиқни сақлаш вазирлиги ишбилармон ва тадбиркорлардан ўз ходимларини 2022 йил 20 январга қадар коронавирусга қарши эмлашни ҳамда сабабсиз эмланмаганларни ишга қўймаслик чораларини кўришни сўраган эди. Маълум қилинишича, бош давлат санитария врачининг 2021 йил 17 июлдаги 11-сон қарорида 18 ёшдан катта аҳоли қатламини коронавирус инфекциясига қарши эмлаш белгиланган. Меҳнат кодексининг 113-моддасига кўра, ходим эмланишни рад этса, иш берувчи уни ишга қўймасликка ҳақли.
Изоҳ (0)