Davlat soliq qo‘mitasi soliq uzilishi ko‘rsatkichi to‘g‘risida tushuntirish berdi

Davlat soliq qo‘mitasi 27-yanvar kuni bo‘lib o‘tgan davra suhbatida aytib o‘tilgan xulosalarni inobatga olganini ma’lum qildi.

Soliq uzilishining informatsion ko‘rsatkichlaridan foydalanish orqali bugungi kunga qadar 32 mingdan ortiq soliq to‘lovchining kontragentlarida to‘lov intizomini yaxshilash ishlari olib borilgan. 

Shuningdek, imtiyozli aylanmalarni to‘g‘ri aks ettirish hisobiga “uzilish nuqtalari” qisqartirilgan. Natijada o‘tgan davrda mamlakat bo‘yicha soliq uzilishi ko‘rsatkichi 0,37 dan 0,22 gacha pasaydi.

Qo‘mita ma’lumotlariga ko‘ra, 2022-yil 1-fevraldan soliq uzilishini hisoblash formulasiga soliq imtiyozlari va QQSning nol stavkasini qo‘llashni nazarda tutuvchi o‘zgartirishlar kiritilgani ma’lum qilindi. Bu yana 13 ming soliq to‘lovchi uchun uzilish ko‘rsatkichlarini yaxshilash imkonini beradi.

Ayni paytda, soliq to‘lovchining shaxsiy kabinetida soliq to‘lovchining kontragentlari kesimida soliq uzilishi ko‘rsatkichi va tegishli uzilish hajmi bilan tanishish xizmati yo‘lga qo‘yildi.

Soliq uzilishi nima?

Soliq uzilishi deganda budjetga QQS to‘lamagan yoki o‘zaro operatsiyalarini o‘z hisobvaraq-fakturalarida aks ettirmagan yoxud soliq organlariga soliq hisobotini taqdim etmagan kontragentlar bilan amalga oshirilgan operatsiyalar bo‘yicha soliq to‘lovchi tomonidan ushbu kontragentlardan olingan hisobvaraq-fakturalar asosida hisobga olinadigan QQS summalarini o‘zining soliq hisobotida aks ettirish tushuniladi.

Soliq uzilishi koeffitsiyenti faqat informativ xarakterga ega bo‘lib, kontragentlarni tanlashda lozim darajada ehtiyotkor bo‘lishga xizmat qiladi. Ushbu koeffitsiyent soliq to‘lovchining QQS guvohnomasi holatiga ta’sir etmaydi.

Koeffitsiyentlar darajasi qanday?

Kontragentlarni tanlash chog‘ida lozim darajada ehtiyotkorlik qilish uchun soliq to‘lovchilarga soliq organlarida mavjud bo‘lgan ma’lumotlarni qo‘shimcha ravishda berish maqsadida, hisobvaraq-fakturalarni rasmiylashtirish elektron tizimida yetkazib beruvchi va xaridor rekvizitlarining tagida ularning soliq uzilishlari koeffitsiyenti (0,00 dan 1,00 gacha) to‘g‘risidagi ma’lumotlar joylashtiriladi. 

Bunda, koeffitsiyentlar:

• 0,00 dan 0,20 gacha bo‘lganda “yashil” rang soliq uzilishining past darajasi;
• 0,21 dan 0,40 gacha bo‘lganda “apelsin” rang soliq uzilishining o‘rta darajasi;
• 0,41 dan 0,60 gacha bo‘lganda “och qizil” rang soliq uzilishining yuqori darajasi;
• 0,61 dan 1,00 gacha bo‘lganda “to‘q qizil” rang soliq uzilishining o‘ta yuqori darajasini bildiradi.