Давлат солиқ қўмитаси солиқ узилиши кўрсаткичи тўғрисида тушунтириш берди

Давлат солиқ қўмитаси 27 январь куни бўлиб ўтган давра суҳбатида айтиб ўтилган хулосаларни инобатга олганини маълум қилди.

Солиқ узилишининг информацион кўрсаткичларидан фойдаланиш орқали бугунги кунга қадар 32 мингдан ортиқ солиқ тўловчининг контрагентларида тўлов интизомини яхшилаш ишлари олиб борилган. 

Шунингдек, имтиёзли айланмаларни тўғри акс эттириш ҳисобига «узилиш нуқталари» қисқартирилган. Натижада ўтган даврда мамлакат бўйича солиқ узилиши кўрсаткичи 0,37 дан 0,22 гача пасайди.

Қўмита маълумотларига кўра, 2022 йил 1 февралдан солиқ узилишини ҳисоблаш формуласига солиқ имтиёзлари ва ҚҚСнинг нол ставкасини қўллашни назарда тутувчи ўзгартиришлар киритилгани маълум қилинди. Бу яна 13 минг солиқ тўловчи учун узилиш кўрсаткичларини яхшилаш имконини беради.

Айни пайтда, солиқ тўловчининг шахсий кабинетида солиқ тўловчининг контрагентлари кесимида солиқ узилиши кўрсаткичи ва тегишли узилиш ҳажми билан танишиш хизмати йўлга қўйилди.

Солиқ узилиши нима?

Солиқ узилиши деганда бюджетга ҚҚС тўламаган ёки ўзаро операцияларини ўз ҳисобварақ-фактураларида акс эттирмаган ёхуд солиқ органларига солиқ ҳисоботини тақдим этмаган контрагентлар билан амалга оширилган операциялар бўйича солиқ тўловчи томонидан ушбу контрагентлардан олинган ҳисобварақ-фактуралар асосида ҳисобга олинадиган ҚҚС суммаларини ўзининг солиқ ҳисоботида акс эттириш тушунилади.

Солиқ узилиши коэффициенти фақат информатив характерга эга бўлиб, контрагентларни танлашда лозим даражада эҳтиёткор бўлишга хизмат қилади. Ушбу коэффициент солиқ тўловчининг ҚҚС гувоҳномаси ҳолатига таъсир этмайди.

Коэффициентлар даражаси қандай?

Контрагентларни танлаш чоғида лозим даражада эҳтиёткорлик қилиш учун солиқ тўловчиларга солиқ органларида мавжуд бўлган маълумотларни қўшимча равишда бериш мақсадида, ҳисобварақ-фактураларни расмийлаштириш электрон тизимида етказиб берувчи ва харидор реквизитларининг тагида уларнинг солиқ узилишлари коэффициенти (0,00 дан 1,00 гача) тўғрисидаги маълумотлар жойлаштирилади. 

Бунда, коэффициентлар:

• 0,00 дан 0,20 гача бўлганда «яшил» ранг солиқ узилишининг паст даражаси;
• 0,21 дан 0,40 гача бўлганда «апельсин» ранг солиқ узилишининг ўрта даражаси;
• 0,41 дан 0,60 гача бўлганда «оч қизил» ранг солиқ узилишининг юқори даражаси;
• 0,61 дан 1,00 гача бўлганда «тўқ қизил» ранг солиқ узилишининг ўта юқори даражасини билдиради.