O‘zbekistonda 2022-yil boshidan 25-yanvarga qadar ulgurji iste’molchilar tomonidan 215 ta holatda tabiiy gazdan noqonuniy foydalanilgani aniqlandi, deb xabar beradi “O‘zneftgazinspeksiya”.
Ta’kidlanishicha, noqonuniy gazdan foydalanish oqibatida yetkazilgan zarar miqdori 5,5 milliard so‘mni, hisob-kitob qilingan gaz hajmi 4,9 million metr kubni tashkil etgan.
Ma’lum qilinishicha, respublika aholisi va ijtimoiy soha muassasalarini tabiiy gaz bilan uzluksiz ta’minlash bo‘yicha Energetika vazirligi tomonidan tashkil etilgan respublika va hududiy komissiyalar ish olib bormoqda. Bu borada avtomobillarga gaz to‘ldirish kompressor shoxobchalarini mahalliy hokimliklar tomonidan tasdiqlangan reja-grafikka asosan sutkaning ma’lum vaqtida tabiiy gaz qisqartirilishi nazoratga olingan.
Amalga oshirilgan ishlar natijasida 24-yanvar kuniga qadar AGTKShlardan bo‘shatilgan 66,6 million metr kub tabiiy gaz hajmlari aholi xonadonlari va ijtimoiy soha muassasalariga yo‘naltirilgan.
Eslatib o‘tamiz, 25-yanvar kuni soat 11:00 larda O‘zbekistonning qator viloyatlarida elektr energiyasi ta’minoti uzildi. Buning ortidan tabiiy gaz yetkazib berilishida ham uzilishlar kuzatildi. 27-yanvarga kelib Toshkentning 6 ta tumanida, 28-yanvarda butun mamlakatda gaz ta’minoti to‘liq tiklandi.
Izoh (0)