Andijon viloyatining Jalaquduq tumanida 17 yoshli qiz o‘lik holda dunyoga keltirgan chaqalog‘i jasadini uyi yaqinidagi binoning orqa tomoniga tashlab ketgani aniqlandi. Bu haqda “Daryo” muxbiri xabar bermoqda.
Andijon viloyat prokuraturasi axborot xizmatining ma’lum qilishicha, 2022-yilning 21-yanvar kuni soat 09:30 larda tumandagi “Janubiy Olamushuk” shaharchasi, “Ittifoq” mahallasidagi ko‘p qavatli uylar joylashgan hududdan qiz jinsli yangi tug‘ilgan chaqaloqning jasadi tashqi tan jarohatlarsiz topilgan.
Mazkur holat bo‘yicha voqea joyi huquqni muhofaza qiluvchi organlari, viloyat sud tibbiy ekspertiza mutaxassislari hamda tezkor-tergov guruhi a’zolari ishtirokida hodisa joyi va chaqaloq jasadi ko‘zdan kechirilgan.
Olib borilgan tergovga qadar tekshiruv davomida chaqaloqni shaharchaning “Navoiy” mahallasida yashovchi voyaga yetmagan M.Sh. (2004-yilda tug‘ilgan) yashash uyining yonidagi qurilishi tugallanmagan bino ichida 20-yanvar kuni soat 23:00 larda o‘lik holatda tug‘ib, uning jasadini ushbu binoning orqa tomoniga tashlab ketgani aniqlangan.
Sud-tibbiy ekspertizasi ilmiy-amaliy markazi Andijon filialining dastlabki ma’lumotnomasida tug‘ilgan chaqaloq o‘lik homila ekani aniqlangan. Chaqaloqning o‘lim sabablarini hamda badanlarida tan jarohatlari yoki ularning izlari bor-yo‘qligini aniqlash maqsadida sud-tibbiy ekspertizasi tayinlanib, ijro etishlik uchun viloyat sud-tibbiy ekspertiza byurosiga yuborilgan.
Mazkur holat yuzasidan Jalaquduq tuman prokuraturasi tomonidan tergovga qadar tekshirish harakatlari davom ettirilmoqda.
Avvalroq Farg‘onada 20 yoshli qiz ko‘chadan chaqaloq topib olganini aytib IIBga murojaat qilgani, surishtiruv natijasida chaqaloqni uning o‘zi dunyoga keltirgani aniqlangani haqida xabar berilgandi.
Izoh (0)