Ўзбекистонда 2022 йил бошидан 25 январга қадар улгуржи истеъмолчилар томонидан 215 та ҳолатда табиий газдан ноқонуний фойдаланилгани аниқланди, деб хабар беради «Ўзнефтгазинспекция».
Таъкидланишича, ноқонуний газдан фойдаланиш оқибатида етказилган зарар миқдори 5,5 миллиард сўмни, ҳисоб-китоб қилинган газ ҳажми 4,9 миллион метр кубни ташкил этган.
Маълум қилинишича, республика аҳолиси ва ижтимоий соҳа муассасаларини табиий газ билан узлуксиз таъминлаш бўйича Энергетика вазирлиги томонидан ташкил этилган республика ва ҳудудий комиссиялар иш олиб бормоқда. Бу борада автомобилларга газ тўлдириш компрессор шохобчаларини маҳаллий ҳокимликлар томонидан тасдиқланган режа-графикка асосан сутканинг маълум вақтида табиий газ қисқартирилиши назоратга олинган.
Амалга оширилган ишлар натижасида 24 январь кунига қадар АГТКШлардан бўшатилган 66,6 миллион метр куб табиий газ ҳажмлари аҳоли хонадонлари ва ижтимоий соҳа муассасаларига йўналтирилган.
Эслатиб ўтамиз, 25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Бунинг ортидан табиий газ етказиб берилишида ҳам узилишлар кузатилди. 27 январга келиб Тошкентнинг 6 та туманида, 28 январда бутун мамлакатда газ таъминоти тўлиқ тикланди.
Изоҳ (0)