Бухорода эркак телефон орқали жанжаллашган йигитни уриб ўлдирди

Бухоро вилояти Когон туманида 28 январь куни эркак ўзидан 10 ёш кичик йигитни уриб ўлдириб қўйди. Бу ҳақда Тергов департаменти хабар қилмоқда.

Қайд этилишича, ҳолат шу куни соат 02:30 ларда Когон туман Жомард қишлоғи 71-уй олдидан ўтган ички йўлда содир бўлган. Ж.Ж. исми эркак (1991 йилда туғилган) И.А. (2001 йилда туғилган) билан учрашиб, ўзаро бўлган келишмовчиликлар оқибатида жанжаллашиб қолган. Оқибатда Ж.Ж. йигитнинг бош ва юз соҳаларига қўли билан уриб, оғир тан жароҳати етказган ва ҳодиса жойидан яширинган.

И.А. олган тан жароҳатлари билан шифохонанинг жонлантириш бўлимига ётқизилган. Кўрсатилган тиббий муолажаларга қарамасдан вафот этган.

Тергов жараёнида аниқланишича, жиноятнинг келиб чиқишнинг сабаби Ж.Ж. бир кун олдин маст ҳолда жабрланувчи билан телефон орқали бир-бирини ҳақорат қилиб, сўнгра юқорида кўрсатилган манзилда учрашган ва натижада Ж.Ж. жабрланувчига оғир тан жароҳати етказган.

Ҳолат юзасидан Жиноят кодексининг 104-моддаси 3-қисми «г» банди (қасддан баданга оғир шикаст етказиш) билан жиноят иши қўзғатилиб, «қамоққа олиш» тарзидаги эҳтиёт чораси қўлланилган.

Бу турдаги жиноятлар учун Жиноят кодексининг нормаларига кўра, 8 йилдан 10 йилгача озодликдан маҳрум қилиш жазоси белгиланган.