Ijtimoiy tarmoqlarda Samarqand shahrida bir yigit ko‘chada ketayotgan kishini tepgani tasvirlangan video tarqaldi. Samarqand viloyati IIBning ma’lum qilishicha, videolavhadagi holat shahar IIO FMB xodimlari tomonidan o‘rganib chiqilgan.
Ma’lum bo‘lishicha, voqea 2022-yilning 24-yanvar kuni soat taxminan 19:00 larda Samarqand shahri “Qo‘shchinor” mahallasida sodir bo‘lgan. Voyaga yetmagan O‘.A. (2007-yilda tug‘ilgan) mahalladoshi F.R.ning (1968-yilda tug‘ilgan) yuz qismiga tepib, hodisa joyini tark etgan.
Holatni O‘.A.ning tanishi, 16 yoshli R.K. tasvirga olib, ijtimoiy tarmoqlarga tarqatgan.
Ta’kidlanishicha, holat yuzasidan voyaga yetmagan O‘.A.ning ota-onasiga nisbatan o‘rnatilgan tartibda hujjatlar rasmiylashtirilmoqda. Shuningdek, bo‘lib o‘tgan hodisa maktab rahbariyati ishtirokida ham muhokama etilgan.
“Qo‘shimcha sifatida aytish mumkinki, O‘.A sport bilan shug‘ullanib kelgan. Ijtimoiy tarmoqlarda tarqalgan videolarda aytilganidek, yigit tiktoker yoki tarmoq faoli emas”, — deyiladi munosabatda.
Hozirda Samarqand shahri bo‘yicha IIO FMB tomonidan tergovga qadar tekshiruv harakatlari olib borilmoqda.
Avvalroq Namanganda 21 yoshli reperni pichoqlab o‘ldirgan tiktoker 17 yilga qamalgani to‘g‘risida xabar berilgandi.
Izoh (0)