Kolumbiyada ZF-UZ-VAC2001 vaksinasidan favqulodda foydalanishga ruxsat berildi. Bu haqda Innovatsion rivojlanish vazirligi “Daryo”ga ma’lum qildi.
Qayd etilishicha, mazkur qaror Anhui Zhifei Longcom Biopharmaceutical Co Ltd tomonidan ishlab chiqilgan vaksinani Janubiy Amerikada qo‘llanilishi COVID-19 pandemiyasiga qarshi global hamkorlik imkoniyatini kengaytiradi.
Hozirgacha mazkur vaksina O‘zbekiston, Xitoy va Indoneziyada ommaviy emlash jarayonida qo‘llanilmoqda, shuningdek buster vaksina sifatida foydalanilmoqda. O‘zbek-xitoy vaksinasi Xitoy va O‘zbekistonda ishlab chiqariladi. Indoneziyada ham ishlab chiqarish rejalashtirilgan bo‘lib, vaksinani mahalliylashtirishga tayyorgarlik ko‘rilmoqda.
Genotiplash tahlili ZF-UZ-VAC2001 vaksinasi koronavirusning alfa variantiga qarshi 92,68 foiz va delta variantiga qarshi 81,38 foiz samaraga egaligini namoyish etgan.
Eslatib o‘tamiz, Innovatsion rivojlanish vazirligi ma’lumotlariga ko‘ra, o‘zbek-xitoy vaksinasining kuchaytirilgan dozasi “omikron”dan deyarli 100 foiz himoya qiladi.
2021-yil oktabr oyida Indoneziyada o‘zbek-xitoy vaksinasidan foydalanishga ruxsat berilgandi. “Indoneziya OAVlarida xabar berilishicha, ZF-UZ-VAC2001 vaksinasi COVID-19 virusiga qarshi umumiy 92,92 foiz samaradorlikni ko‘rsatgan. Indoneziyada shu paytgacha Bio Farma, Moderna, Pfizer, AstraZeneca, Sinopharm, up CanSino kabi vaksinalar qo‘llangan”, — deyiladi xabarda.
Izoh (0)