O‘zbekiston Superligasi klublari 2022-yilgi mavsumga tayyorgarlik olib bormoqda va yangi futbolchilarni ro‘yxatdan o‘tkazmoqda. Quyida Superliga klublariga doir so‘nggi xabarlar taqdim etiladi.
Ro‘ziqul Berdiyev “Nasaf”da qoldi
“Nasaf” bosh murabbiyi Ro‘ziqul Berdiyev klub bilan amaldagi shartnomani ikki yilga uzaytirdi. U 2023-yilgacha “ajdarlar” boshqaruvida bo‘ladi.
Klub matbuot xizmatiga ko‘ra, jamoa oldiga yangi mavsumda jiddiy maqsadlar, xususan O‘zbekiston Superkubogi, O‘zbekiston chempionligi va O‘zbekiston Kubogini qo‘lga kiritish hamda xalqaro maydonlarda mamlakat sharafini munosib himoya qilish qo‘yilgan.
Shuningdek, klub matbuot xizmati bir qator futbolchilar bilan shartnomalar uzaytirilganini ma’lum qildi: Marko Stanoyevich, Bahrom Abdurahimov va Umar Eshmurodov bilan bir yillik yangi shartnoma imzolangan.
Sharof Muhiddinov “Paxtakor”dagi bir yillik mavsumdan keyin yana “Nasaf”ga qaytgan bo‘lsa, o‘tgan birinchilikda “Navbahor”da to‘p surgan Ivan Solovyov yangi mavsumni qarshiliklar safida boshlaydi.
Andriya Kaluderovich va Doniyor Narzullayev esa “ajdarlar” safini tark etgan. Shohmalik Komilov, Jasur Jumayev va Jo‘rabek Mannonov Samarqandning “Dinamo” jamoasiga “Nasaf”futbol klubi uchun moliyaviy foydali shartlar asosida, Abubakr-Rizo Turdialiyev esa “Olimpik” jamaosiga bir mavsumga ijaraga berilgan.
“Dinamo Samarqand” legioner futbolchi bilan shartnoma imzoladi
Samarqandning “Dinamo” klubi Bosniya va Gersegovina vakili Aleksandar Glishich bilan shartnoma imzoladi. Klub matbuot xizmatiga ko‘ra, u jamoaga erkin agent sifatida qo‘shilgan. Biroq shartnoma muddati haqida ma’lumot berilmagan.
Uning oxirgi klubi Armanistonning “Alashkert” klubi bo‘lgan.
Temirxo‘ja Abduxoliqov “Qizilqum”ga o‘tdi
Hujumchi Temirxo‘ja Abduxoliqov faoliyatini “Qizilqum”da davom ettiradi. Bu haqda klub matbuot xizmati xabar berdi. Biroq navoiyliklar ham shartnoma muddati haqida hech qanday ma’lumot bermagan.
Ma’lumot uchun, Abduxoliqov faoliyati davomida “Paxtakor”, “Xayduk” (Xorvatiya), “As-Sayliya” (Qatar), “Xaur-Fakkan” (BAA) singari klublarda harakat qilgan. Uning so‘nggi klubi Toshkentning “Lokomotiv”i bo‘ldi.
Shuningdek, klub serbiyalik futbolchi Aleksandar Stanislavlevich bilan shartnoma imzolanganini ma’lum qildi. Qayd etish kerak, Stanislavlevich bungacha “Qaysar” (Qozog‘iston) safida to‘p surayotgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)