Рўзиқул Бердиев «Насаф»да қолди, Темирхўжа Абдухолиқов «Қизилқум»га ўтди, «Навбаҳор» легионери Қаршига йўл олди. Суперлига клублари янгиликлари

Ўзбекистон Суперлигаси клублари 2022 йилги мавсумга тайёргарлик олиб бормоқда ва янги футболчиларни рўйхатдан ўтказмоқда. Қуйида Суперлига клубларига доир сўнгги хабарлар тақдим этилади.

Рўзиқул Бердиев «Насаф»да қолди

«Насаф» бош мураббийи Рўзиқул Бердиев клуб билан амалдаги шартномани икки йилга узайтирди. У 2023 йилгача «аждарлар» бошқарувида бўлади.

Клуб матбуот хизматига кўра, жамоа олдига янги мавсумда жиддий мақсадлар, хусусан Ўзбекистон Суперкубоги, Ўзбекистон чемпионлиги ва Ўзбекистон Кубогини қўлга киритиш ҳамда халқаро майдонларда мамлакат шарафини муносиб ҳимоя қилиш қўйилган.

Шунингдек, клуб матбуот хизмати бир қатор футболчилар билан шартномалар узайтирилганини маълум қилди: Марко Станоевич, Баҳром Абдураҳимов ва Умар Эшмуродов билан бир йиллик янги шартнома имзоланган.

Шароф Муҳиддинов «Пахтакор»даги бир йиллик мавсумдан кейин яна «Насаф»га қайтган бўлса, ўтган биринчиликда «Навбаҳор»да тўп сурган Иван Соловёв янги мавсумни қаршиликлар сафида бошлайди.

Андрия Калудерович ва Дониёр Нарзуллаев эса «аждарлар» сафини тарк этган. Шоҳмалик Комилов, Жасур Жумаев ва Жўрабек Маннонов Самарқанднинг «Динамо» жамоасига «Насаф»футбол клуби учун молиявий фойдали шартлар асосида, Абубакр-Ризо Турдиалиев эса «Олимпик» жамаосига бир мавсумга ижарага берилган.

«Динамо Самарқанд» легионер футболчи билан шартнома имзолади

Самарқанднинг «Динамо» клуби Босния ва Герцеговина вакили Александар Глишич билан шартнома имзолади. Клуб матбуот хизматига кўра, у жамоага эркин агент сифатида қўшилган. Бироқ шартнома муддати ҳақида маълумот берилмаган.

Унинг охирги клуби Арманистоннинг «Алашкерт» клуби бўлган.

Темирхўжа Абдухолиқов «Қизилқум»га ўтди

Ҳужумчи Темирхўжа Абдухолиқов фаолиятини «Қизилқум»да давом эттиради. Бу ҳақда клуб матбуот хизмати хабар берди. Бироқ навоийликлар ҳам шартнома муддати ҳақида ҳеч қандай маълумот бермаган.

Маълумот учун, Абдухолиқов фаолияти давомида «Пахтакор», «Хайдук» (Хорватия), «Ас-Сайлия» (Қатар), «Хаур-Факкан» (БАА) сингари клубларда ҳаракат қилган. Унинг сўнгги клуби Тошкентнинг «Локомотив»и бўлди.

Шунингдек, клуб сербиялик футболчи Александар Станиславлевич билан шартнома имзоланганини маълум қилди. Қайд этиш керак, Станиславлевич бунгача «Қайсар» (Қозоғистон) сафида тўп сураётганди.