O‘zbekiston milliy terma jamoasi Janubiy Sudan bilan o‘rtoqlik uchrashuvi o‘tkazadi. Bu haqida O‘FA matbuot xizmati ma’lum qildi.
Dubaydagi o‘quv-mashg‘ulot yig‘ini davomida O‘zbekiston terma jamoasi 27-yanvar kuni Janubiy Sudan terma jamoasi bilan o‘rtoqlik uchrashuvida ishtirok etadi. Avvalroq, terma jamoa Bahrayn bilan o‘rtoqlik o‘yini o‘tkazishi xabar qilingan edi. Ammo Bahrayndagi epidemiologik vaziyat sababli ushbu jamoa BAAdagi yig‘inni bekor qilishga majbur bo‘ldi. Natijada O‘zbekiston terma jamoasi Janubiy Sudan bilan o‘yin o‘tkazish borasida o‘zaro kelishuvga erishdi.
Uchrashuv 27-yanvar kuni 18:00 da boshlanadi.
Qayd etish kerak, O‘FA bayonotidagi matnda Janubiy Sudanga qarshi o‘yinni nazorat uchrashuvi sifatida qayd etilgan. FIFA kunlarida o‘rtoqlik o‘yini emas nazorat uchrashuvi o‘tkazish mantiqqa to‘g‘ri kelmagani bois “Daryo” bu masalaga oydinlik kiritish uchun tashkilot matbuot xizmati bilan bog‘landi. Ma’lum bo‘lishicha, mazkur o‘yin xalqaro o‘rtoqlik uchrashuvi maqomida o‘tadi. Ma’lumot uchun, nazorat o‘yini maqomidagi bahslar FIFA tomonidan inobatga olinmaydi.
Eslatib o‘tamiz, O‘zbekiston terma jamoasi 23-yanvar kuni “Al-Vahda” jamoasi bilan o‘rtoqlik o‘yini o‘tkazib, 1:0 hisobida g‘alaba qozondi. Unga qadar terma jamoa 2021-yilning sentabr oyida Shvetsiyaga qarshi o‘rtoqlik o‘yini o‘tkazib, 1:2 hisobida mag‘lub bo‘lgandi. Oktabr oyidagi o‘rtoqlik uchrashuvlarida Malayziya (5:1) ustidan g‘alaba qozonib, Iordaniyaga qarshi o‘yinda (0:3) yengildi. Noyabr oyida esa Gruziyaga kichik hisobda (0:1) mag‘lub bo‘ldi.
Izoh (0)