O‘zbekistonlik yakkakurashchi Mahmud Murodovning (25-7) UFC’dagi beshinchi jangi bekor qilindi. Bu haqda sportchi o‘zining Instagram sahifasi orqali ma’lum qildi.
Assalomu alaykum. Qayg‘uli xabar bilan bo‘lishmoqchiman, afsuski, mashg‘ulotlarda qo‘limdan jarohat oldim. Muayyan tekshiruvlardan so‘ng tiklanish jarayoni qancha davom etishi aniq bo‘ladi. Raqibim, UFC va barcha muxlislarimdan uzr so‘rayman. 26-fevral kuni jang qilishni juda xohlagan edim, puxta tayyorgarlik ko‘rdim, afsuski, jarohat ham peshonamizda bor ekan. Bu jang martga ko‘chirilsa xursand bo‘lardim.Yana bir bor barchadan uzr so‘rayman, bu sport va ba’zi holatlarda biz shunchaki ojizmiz.
Inshaalloh tiklanib yanada kuchliroq bo‘lib qaytamiz.
Mahmud Murodov, UFC jangchisi
Avvalroq Murodovning AQShning Las-Vegas shahrida o‘tkaziladigan UFC musobaqasida Latviya vakili Misha Sirkunovga qarshi jang qilishi haqida xabar berilgandi. Shuningdek, mazkur UFC oqshomining asosiy jangi yengil vazn toifasi vakillari Islom Maxachev (21-1) va Beneil Dariush (21-1-4) o‘rtasida kechishi ma’lum qilingandi.
Murodov oxirgi jangini 2021-yilning avgust oyida Jerald Mirshertga (33-14) qarshi o‘tkazib, UFC’dagi ilk mag‘lubiyatini qabul qilib olgandi.
Ma’lumot uchun, Murodov UFC’dagi debyut jangida italiyalik Alessio di Kirikoni (13-5) ochkolar hisobiga ko‘ra, ikkinchi jangida Trevor Smit (15-10), uchinchisida esa Endyu Sanchesni (12-6) nokaut evaziga mag‘lubiyatga uchratgan.
13-yanvar kuni Saidyoqub Qahramonovda koronavirus aniqlangani sababli uning UFC’dagi 2-jangi bekor qilingandi.
Izoh (0)