Ўзбекистонлик яккакурашчи Маҳмуд Муродовнинг (25-7) UFC’даги бешинчи жанги бекор қилинди. Бу ҳақда спортчи ўзининг Instagram саҳифаси орқали маълум қилди.
Ассалому алайкум. Қайғули хабар билан бўлишмоқчиман, афсуски, машғулотларда қўлимдан жароҳат олдим. Муайян текширувлардан сўнг тикланиш жараёни қанча давом этиши аниқ бўлади. Рақибим, UFC ва барча мухлисларимдан узр сўрайман. 26 февраль куни жанг қилишни жуда хоҳлаган эдим, пухта тайёргарлик кўрдим, афсуски, жароҳат ҳам пешонамизда бор экан. Бу жанг мартга кўчирилса хурсанд бўлардим.Яна бир бор барчадан узр сўрайман, бу спорт ва баъзи ҳолатларда биз шунчаки ожизмиз.
Иншааллоҳ тикланиб янада кучлироқ бўлиб қайтамиз.
Маҳмуд Муродов, UFC жангчиси
Аввалроқ Муродовнинг АҚШнинг Лас-Вегас шаҳрида ўтказиладиган UFC мусобақасида Латвия вакили Миша Циркуновга қарши жанг қилиши ҳақида хабар берилганди. Шунингдек, мазкур UFC оқшомининг асосий жанги енгил вазн тоифаси вакиллари Ислом Махачев (21-1) ва Бенеил Дариуш (21-1-4) ўртасида кечиши маълум қилинганди.
Муродов охирги жангини 2021 йилнинг август ойида Жеральд Миршертга (33-14) қарши ўтказиб, UFC’даги илк мағлубиятини қабул қилиб олганди.
Маълумот учун, Муродов UFC’даги дебют жангида италиялик Алессио ди Кирикони (13-5) очколар ҳисобига кўра, иккинчи жангида Тревор Смит (15-10), учинчисида эса Эндю Санчесни (12-6) нокаут эвазига мағлубиятга учратган.
13 январь куни Саидёқуб Қаҳрамоновда коронавирус аниқлангани сабабли унинг UFC’даги 2-жанги бекор қилинганди.
Изоҳ (0)