Samarqand shahrida joylashgan 59-sonli ko‘zi ojizlar maktab-internati oldidagi ko‘chaga ovozli svetofor o‘rnatilgan. Bu haqda viloyat IIB axborot xizmati “Daryo”ga ma’lum qildi.
Ta’kidlanishicha, Samarqand viloyat IIB boshlig‘i Samarqand shahridagi “Charmgari” mahallasida joylashgan 59-sonli ko‘zi ojiz bolalar uchun ixtisoslashtirilgan maktab-internati faoliyati bilan tanishgan.
Maktab-internat joylashgan Sadriddin Ayniy ko‘chasi Samarqand shahrining markaziy va gavjum ko‘chalaridan biri hisoblanadi. Shu sababli maktab jamoasi talablaridan kelib chiqib, mazkur ko‘chada ular uchun ovozli svetofor qo‘yib berilgan.
Samarqand viloyati IIB YHXB tomonidan o‘rnatilgan mazkur svetofor ko‘zi ojiz insonlarning yo‘ldan kesib o‘tish jarayonlarini yanada osonlashtiradi va har bir chiroq yongani haqida ovozli xabar berib ogohlantiradi.
“Maktab-internat jamoasi talablaridan kelib chiqib, bugun ular uchun ovozli svetofor qo‘yib berildi. Samarqand viloyati IIB YHXB tomonidan o‘rnatilgan svetofor ko‘zi ojiz insonlarni yo‘ldan kesib o‘tish jarayonlarini yanada osonlashtiradi va har bir chiroq yongani haqida ovozli xabar berib ogohlantiradi”, — deydi viloyat IIB matbuot xizmati rahbari Jahongir Sagdullayev.
Avvalroq O‘zbekiston ko‘zi ojizlar to‘g‘risidagi Marokash shartnomasiga qo‘shilgani xabar qilingandi. Shuningdek, o‘zgalar parvarishiga muhtoj yolg‘iz keksalar va nogironligi bo‘lgan shaxslarga “aqlli soat”lar yetkazib berilishi ma’lum qilingan.
Izoh (0)