Yashnobod tumani “Fazogir” mahallasi 3-raqamli uy aholisi muammolardan shikoyat qilib, turli idoralarga murojaat qilishdan charchagan. Hozircha natija yo‘q. “Daryo” “Noobod mahalla” loyihasida bu safar “Fazogir” mahallasidagi muammolarni o‘rgandi.
3-raqamli ko‘p qavatli uy aholisini qiynayotgan muammolardan biri bu — bolalar maydonchasining yomon ahvoli. Bu yer yog‘ingarchiliklardan so‘ng loyga to‘ladi. Uy bekalari bolalarning kiyimlarini hadeb yuvishdan charchab, oxiri ularga maydonchaga chiqishni taqiqlab qo‘ygan.
Shuningdek, 3-uy hovlisidagi daraxtlar ariqlardan suv kelishi to‘xtagani sababli tobora qurib bormoqda. Qurigan daraxt shoxlarining sinishi odamlar hayotiga xavf tug‘dirishi mumkin.
Mahalla aholisi biz bilan suhbatda bu yerdagi ko‘p qavatli uylar anchadan beri ta’mir qilinmaganini ma’lum qildi. Faqat uylarning fasadi o‘tgan yili bo‘yalgan ekan. Аmmo shu ish ham chala qolib ketganiga guvoh bo‘lish mumkin.
Shuningdek, 3-uy aholisini chiqindi tashlash bilan bog‘liq muammo ham qiynab kelmoqda. Аvval ushbu uy oldida chiqindi tashlash uchun maxsus konteynerlar saqlanadigan, atrofi o‘ralgan joy bo‘lgan. Keyinchalik bu hududga oziq-ovqat do‘koni qurilib, konteynerlar ancha uzoqqa olib qo‘yilgan. Hozirda axlat tashlash uchun bu konteynerlar oldiga yaqinlashish qiyin. Sababi yo‘l notekis, qurilish chiqindilari har yerga to‘kilgan.
Mahalla aholisini eshitganimizdan so‘ng, biz “Fazogir” mahallasi raisidan vaziyat bo‘yicha izoh olishga qaror qildik. Аmmo mahalla raisi hozirda betob ekanini aytib, intervyu berishdan bosh tortdi.
Shundan so‘ng Yashnobod tumani hokimligiga murojaat qilib, mahalla bo‘yicha mas’ullarni izladik. Hokimiyat qabulxonasi tomonidan bizga berilgan raqamlarga qo‘ng‘iroq qilganimizda go‘shakni hech kim ko‘tarmadi.
Shu sababli “Noobod mahalla” dasturi orqali mutasaddilarga murojaat qilmoqchimiz. “Fazogir” mahallasidagi 3-uy aholisini qiynayotgan muammolar qachon ijobiy yechim topadi? Аholi javob kutmoqda...
Izoh (0)