Самарқанд шаҳрида жойлашган 59-сонли кўзи ожизлар мактаб-интернати олдидаги кўчага овозли светофор ўрнатилган. Бу ҳақда вилоят ИИБ ахборот хизмати «Дарё»га маълум қилди.
Таъкидланишича, Самарқанд вилоят ИИБ бошлиғи Самарқанд шаҳридаги «Чармгари» маҳалласида жойлашган 59-сонли кўзи ожиз болалар учун ихтисослаштирилган мактаб-интернати фаолияти билан танишган.
Мактаб-интернат жойлашган Садриддин Айний кўчаси Самарқанд шаҳрининг марказий ва гавжум кўчаларидан бири ҳисобланади. Шу сабабли мактаб жамоаси талабларидан келиб чиқиб, мазкур кўчада улар учун овозли светофор қўйиб берилган.
Самарқанд вилояти ИИБ ЙҲХБ томонидан ўрнатилган мазкур светофор кўзи ожиз инсонларнинг йўлдан кесиб ўтиш жараёнларини янада осонлаштиради ва ҳар бир чироқ ёнгани ҳақида овозли хабар бериб огоҳлантиради.
«Мактаб-интернат жамоаси талабларидан келиб чиқиб, бугун улар учун овозли светофор қўйиб берилди. Самарқанд вилояти ИИБ ЙҲХБ томонидан ўрнатилган светофор кўзи ожиз инсонларни йўлдан кесиб ўтиш жараёнларини янада осонлаштиради ва ҳар бир чироқ ёнгани ҳақида овозли хабар бериб огоҳлантиради», — дейди вилоят ИИБ матбуот хизмати раҳбари Жаҳонгир Сагдуллаев.
Аввалроқ Ўзбекистон кўзи ожизлар тўғрисидаги Марокаш шартномасига қўшилгани хабар қилинганди. Шунингдек, ўзгалар парваришига муҳтож ёлғиз кексалар ва ногиронлиги бўлган шахсларга «ақлли соат»лар етказиб берилиши маълум қилинган.
Изоҳ (0)