Рамзан Қодиров Россия президенти ёки вазир бўлишни истамаслиги ҳақида гапирди

Чеченистон Республикасининг раҳбари Рамзан Қодиров ўзини на Россия президенти, на вазир ва на федерал даражадаги бирор лавозимда кўради. Бу ҳақда у Telegram каналида ёзган.

«Ҳар доим айтганман ва яна айтаман, мен ўзимни федерал лавозимларда кўрмайман — на президент, на вазир ва ҳоказо. Менинг жойим шу ерда, Чеченистон Республикасида ва бу ердан ҳеч қаёққа кетмайман!», — деб ёзади Чеченистон раҳбари.

Қодиров, шунингдек, Россия Украина масаласида қандай йўл тутиши кераклиги ҳақида Чеченистон раҳбари сифатида эмас, балки «блогер» ва «оддий одам» нуқтаъйи назаридан гапирганини қўшимча қилди.

«Агар ҳудуд раҳбари сифатида нимадир дейишимга тўғри келса, ‘Буни мен — Чеченистон Республикасининг раҳбари Рамзан Қодиров айтяпти’, дейман», — таъкидлади у.

Чеченистон раҳбарининг қўшимча қилишича, у Россия ўз ҳудудининг манфаатларини ҳамиша ҳимоя қилишига ишонади.

Россия ва Украина муносабатлари ҳақида Қодиров Чеченистон парламенти раиси Магамед Даудов билан жонли эфир чоғида гапирганди. Унинг фикрича, Россия аллақачон Украинани «қўшиб олиши» ва у ерда тартиб ўрнатиши керак эди, АҚШнинг Украина ҳудудида янги базани жойлаштириш истаги, умуман олганда, икки давлат ўртасидаги муносабатларнинг кескинлашишига олиб келди. Агар Украина фуқаролари қаршилик қилмаса, Россия буни қилиши керак, деб ҳисоблайди Чеченистон раҳбари.

«Агар мен президентнинг ўрнида бўлганимда, Украинани анча олдин эгаллаб, у ерга қўшин жўнатган ва вазиятни тартибга солган бўлардим. Агар давлат тепасида ақлдан озган, коррупционэрлар ўтирган бўлса ва шу давлат орқали улар бизнинг мамлакатимиз хавфсизлигига таҳдид солса, жим қараб туришимиз керакми?», — деди Қодиров.

Россия президенти матбуот котиби Дмитрий Песков Кремль Қодировнинг бундай мулоҳазасига қандай муносабат билдириши ҳақидаги саволга жавоб берар экан, мамлакат ташқи сиёсатини президент белгилаб бериши, Чеченистон раҳбари агар истаса, навбатдаги сайловда қатнашишга уриниб кўриши мумкинлигини таъкидлади.

«Ҳозирча давлат раҳбари — Владимир Путин», — дея қўшимча қилган Песков.

Қодиров аввал ҳам Россия Украинани қўшиб олиши кераклигини айтган, кейинроқ буни Чеченистон раҳбари сифатида эмас, балки оддий шахс сифатида ўз фикрини билдираётгани билан изоҳлаган.

Эслатиб ўтамиз, Чеченистонда 2021 йилнинг сентябрь ойида бўлиб ўтган республика раҳбари сайлови натижалари бўйича Рамзан Қодиров жаҳон рекордини ўрнатганди — сайловчиларнинг 99,7 фоизи унга овоз берган.

Қодиров 2007 йилдан буён Чеченистонни бошқаради (2011 йил 5 апрелгача — республика президенти сифатида). Минтақа раҳбари этиб тайинланган вақтда у 30 ёшда эди.