O‘zbekistondagi maktabgacha ta’lim tashkilotlari yopilmaydi va odatdagidek o‘z ish faoliyatini davom ettiradi. Bu haqda Maktabgacha ta’lim vazirligining axborot xizmati “Daryo” so‘roviga ko‘ra, ma’lum qildi.
“Bog‘chalarni yopish hozircha rejalashtirilmagan. Agar biror-bir bog‘chada koronavirus aniqlansa, o‘sha bog‘chaning o‘zini karantinga olish belgilangan”, — deyiladi vazirlik matbuot xizmati xabarida.
Ta’kidlanishicha, Respublika maxsus komissiyasi maktabgacha ta’lim tashkilotlarining ham faoliyatini vaqtincha to‘xtatib turish bo‘yicha qaror qabul qilsagina, bog‘chalar yopilishi mumkin.
Eslatib o‘tamiz, O‘zbekistonda koronavirus infeksiyasi bilan bog‘liq vaziyatning keskinlashuvi paytida maktabgacha ta’lim tashkilotlarida karantin qoidalariga qat’iy rioya qilinadi. Ota-onalar va tashqaridan mehmonlar kirishiga yo‘l qo‘yilmaydi. Shuningdek, muassasada bayram tadbirlari o‘tkazilishi vaqtinchalik cheklanadi.
Avvalroq O‘zbekistonda maktablar 24-yanvardan boshlab bir oy davomida onlayn faoliyat olib borishi haqida xabar berilgandi. Shuningdek, Prezident ta’lim muassasalari agentligi tizimidagi ta’lim muassalari hamda nodavlat ta’lim tashkilotlarida ham darslar bir oy davomida onlayn davom ettirilishi ma’lum qilindi.
Izoh (0)