Buxorodagi qator tumanlar ichki ishlari tarkibida lavozim o‘zgarishlari bo‘ldi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, IIV Akademiyasida kadrlarni tayyorlash jarayoniga bakalavriat va magistraturani o‘z ichiga oluvchi ikki bosqichli oliy ta’lim tizimi joriy etilgan. Viloyat Ichki ishlar boshlig‘ining birinchi o‘rinbosari, Kogon tumani hamda Jondor tumani ichki ishlar bo‘limi boshliqlarining mazkur oliy ta’limga o‘qishga kirgani munosabati bilan bo‘sh o‘rinlar shakllanib, lavozimlarda o‘zgarishlar bo‘lgan.
Shunga ko‘ra, ichki ishlar vazirining shaxsiy tarkib bo‘yicha buyrug‘i bilan podpolkovnik Abduxalil Nosirov Peshku tumani Ichki ishlar bo‘limi boshlig‘i lavozimiga tayinlangan. Tayinlovga qadar u G‘ijduvon tumani ichki ishlar boshqarmasi boshlig‘ining birinchi o‘rinbosari — tezkor-qidiruv xizmati boshlig‘i lavozimida faoliyat yuritgan.
Viloyat Ichki ishlar boshqarmasi Xavfsiz turizmni ta’minlash boshqarmasi boshlig‘ining o‘rinbosari — muvofiqlashtirish bo‘limi boshlig‘i lavozimida faoliyat yuritgan Umidjon Hasanov Kogon tumani Ichki ishlar bo‘limi boshlig‘i lavozimiga tayinlangan.
Xuddi shuningdek, Peshku tumani Ichki ishlar bo‘limi boshlig‘i lavozimida faoliyat yuritgan Niyoziy Boltayev Jondor tumani Ichki ishlar bo‘limi boshlig‘i lavozimiga tayinlangan.
Viloyat Ichki ishlar boshqarmasi boshlig‘i o‘rinbosari – Xavfsiz turizmni ta’minlash boshqarmasi boshlig‘i lavozimida faoliyat yuritgan Erkin Safarov esa viloyat Ichki ishlar boshqarmasi boshlig‘ining birinchi o‘rinbosari – Tezkor-qidiruv xizmati boshlig‘i lavozimiga tayinlangan.
Eslatib o‘tamiz, avvalroq Ichki ishlar vazirligi tizimida yangi lavozim tayinlovlari amalga oshirilgandi. Bundan tashqari, Xorazm IIB tizimida ham bir qator tayinlovlar kuzatilgan.
Izoh (0)