Ўзбекистондаги мактабгача таълим ташкилотлари ёпилмайди ва одатдагидек ўз иш фаолиятини давом эттиради. Бу ҳақда Мактабгача таълим вазирлигининг ахборот хизмати «Дарё» сўровига кўра, маълум қилди.
«Боғчаларни ёпиш ҳозирча режалаштирилмаган. Агар бирор-бир боғчада коронавирус аниқланса, ўша боғчанинг ўзини карантинга олиш белгиланган», — дейилади вазирлик матбуот хизмати хабарида.
Таъкидланишича, Республика махсус комиссияси мактабгача таълим ташкилотларининг ҳам фаолиятини вақтинча тўхтатиб туриш бўйича қарор қабул қилсагина, боғчалар ёпилиши мумкин.
Эслатиб ўтамиз, Ўзбекистонда коронавирус инфекцияси билан боғлиқ вазиятнинг кескинлашуви пайтида мактабгача таълим ташкилотларида карантин қоидаларига қатъий риоя қилинади. Ота-оналар ва ташқаридан меҳмонлар киришига йўл қўйилмайди. Шунингдек, муассасада байрам тадбирлари ўтказилиши вақтинчалик чекланади.
Аввалроқ Ўзбекистонда мактаблар 24 январдан бошлаб бир ой давомида онлайн фаолият олиб бориши ҳақида хабар берилганди. Шунингдек, Президент таълим муассасалари агентлиги тизимидаги таълим муассалари ҳамда нодавлат таълим ташкилотларида ҳам дарслар бир ой давомида онлайн давом эттирилиши маълум қилинди.
Изоҳ (0)